Ambiente di Pasco total lo wordo sinti Diabierna anochi rond di San Nicolas

Kerstviering na varios scol y tambe Christmas Fair den caya

ORANJESTAD (AAN): Comunidad di Aruba tin di ta pendiente, pasobra Diabierna 8 di December 2023, e ‘Spotlight di Pasco’ lo ta dirigi riba San Nicolas.  Paulus School y tambe Filomena College MAVO lo tin nan celebracion di Pasco.

   Ambiente di Pasco lo wordo sinti tur caminda riba Diabierna anochi, como cu varios Scol lo ta den fiesta di Pasco, Promenade tambe lo ta di fiesta cu Aruba su ‘Christmas Fair 2023’ cu lo ta for di 7:00 pm te cu 11:00 pm.

   Inauguracion di Luznan: Durante un conferencia di prensa e organisador di Christmas Fair 2023, esta Tito Bolivar, a indica cu pa exactamente 7:30 pm, lo bay tin e ceremonia di inauguracion di e Luznan di Pasco cu lo wordo cendi den Promenade.

   E momento ey tur e luznan di color pa decora ciudad di San Nicolas lo wordo cendi.  Alavez lo bay tin e solo-expo di e artista Eliza Lejuez cu lo habri Diabierna, y lo keda habri pa publico henter luna largo.

   Tambe Space21.art cu ta un galeria nobo, lo habri su porta pa 7:30 pm.

   Lo tin Snacktruck y mas: E anochi lo tin Snacktruck, artesania, productonan local, ponche crema, ayaca, ham di pasco, diferente musico.

   E anochi ey Uptown Choir lo presenta na Paulus College, y despues lo acudi na Christmas Fair pa duna presentacion tambe.

   Tambe lo tin show di un Scol di Baile local, aerial dancers, Popcorn Dancers, y hopi mas actividad pa trece tur hende den ambiente di Pasco.   Ainda tin espacio si comerciantenan kier participa den e Fair aki.

   E iluminacion di caya ta bira posible den colaboracion cu Ministro Geoffrey Wever kende a duna su bendicion pa e actividad di Christmas Fair 2023 bira posible.

   Tito Bolivar ta hopi agradecido na Raquel Lampe, directora di Filomena College MAVO cu a uni forsa pa asina haci e Diabierna aki bira uno di ambiente total di Pasco na San Nicolas.

   Di e forma aki por sigui engrandece Pasco na San Nicolas, cu fiesta di Pasco tur caminda.  Bolivar a bisa cu e mes lo bay bishita tanto Filomena College MAVO y tambe Paulus School pa asina check nan delicianan di Pasco, y despues lo tey na e Christmas Fair 2023 mes.

   E ta invita comunidad pa sali rumbo pa San Nicolas.