Alumnonan di La Salle College hayando mas gana pa lanta propio negoshi

ORANJESTAD (AAN): E compania Qredits Aruba tin un solo mision, esta pa yuda mas hende bira un empresario, pues bira e ora doño di nan mesun compania.

  Y pa purba inculca e idea aki cerca futuro comerciantenan, a opta pa cuminza planta e idea aki cerca alumnonan di scol secundario caba.

   Y pesey mes, recientemente e representante di Qredits a acudi na La Salle College MAVO, pa asina comparti cu e alumnonan e viahe cu nan mes lo por cana den futuro, esta e ‘BeYourOwnBoss’, BYOB.

   E topico di e presentacion tabata mezcla di mercadeo, cu ta un componente fundamental di e Plan di Negoshi y e importancia di haci presupuesto priva, cu ta un habilidad crucial pa bo pone metanan financiero bo dilanti, con pa vigila entrada y gastonan, y traha habitonan financiero fuerte y duradero.

   E meta primario di e programa di BYOB ta pa encurasha futuro generacion pa sigui cu nan aspiracionnan di empresario y desaroya habilidadnan esencial pa exito den e economia di awendia cu ta cambia rapidamente.  Sigur algo cu e alumnonan di La Salle College a compronde facilmente.