Alumnonan di Avond Beroepsonderwijs a siña tur fase di arte grafico 

Loucette Reppenhagen, director di Design Academy Aruba

ORANJESTAD (AAN): Loucette Reppenhagen, director di Design Academy Aruba a presenta nan proyecto pa studiantenan di Openbaar Avond Beroepsonderwijs Aruba (OABA).

El a splica cu nan ta un scol pa arte y diseño. Studiantenan ta siña crea formanan grafico, pero tambe pa construi brug entre crea formanan grafico, traha dibuho y transferi nan pa un proyecto 3D. Kiermen un imagen total. Ta realmente dushi pa por construi un brug di teoria pa practica.

Reppenhagen a indica cu pa e alumnonan, e ta funciona hopi bon pa motivacion. Y despues bo tin realmente un producto final. Y e producto final ta e premionan di Hi-Winds di e aña aki. Den e simannan cu a pasa nan a traha, diseña, y traha riba dje. Pa entrega un producto final y pa wak si e ta cuadra cu e demanda di Hi-Winds.

Pasobra despues di e evento nan mester a pitch e proyecto na Hi-Winds. Y esey a bira un momento hopi emocionante. Esaki ta un di e partinan cu nan ta siña den e curso di Art & Design. Traha, diseña, ehecuta grafico y produci un producto.

E alumnonan a traha cu materialnan manera palo, acrilico recicla cu diferente color y diferente metodo pa combina nan den obhetonan 3D. Nan a traha riba dje pa mas o menos 3 siman, for di e fase di sketch te na prototipo, te na producto final y presentacion.

Reppenhagen a agrega cu ora un alumno ta traha algo pa scol, e por keda den klas. Pero nan productonan, e productonan cu e studiantenan ta siña traha, ta pa wordo exporta. Pasobra con bunita e ta si bo por traha un producto, diseña, desaroya pa sociedad, pa bo medio ambiente, pa bo comunidad. Y tambe e ta un diseño di Aruba. Kiermen e ta wordo traha, produci, diseña, desaroya riba Aruba, traha pa un hende local di Aruba. E ta wordo traha, produci y desaroya riba Aruba. E ta un producto local cu ta internacional. Esey ta hopi bunita.

Reppenhagen a termina na bisa cu nan ta hopi orguyoso di e studiantenan.