Alumnonan di Aruba a bishita Quimbaya na Colombia y haya les den klas y verf nan speelplaats

Viahe di Colegio San Antonio durante vakantie...

ORANJESTAD (AAN): Den fin di siman cu a pasa, un grupo di 27 alumno y 4 docente di Colegio San Antonio MAVO na Santa Cruz, a tuma vuelo pa Bogota, pa bay keda den pueblo di Quimbaya na Colombia.  Esaki ta situa den departamento di Quindio, cu ta keda como 170 km west di Bogota.

   Den nan bishita na Colombia, lo bay experiencia un cultura unico, lo bishita scol y intercambia opinion cu hobennan di mesun edad, y lo bay haci trabao boluntario tambe.  Quimbaya ta un pueblo cu tempo fresco, cu den dia ta yega 23º Celsius, y anochi ta baha te 18º C.

   Riba Dialuna a bishita e scol Policarpa Salavarrieta, unda nan a sigui dos les. Den e les di Ingles nan a siña conoce otro y den e les di wiskunde nan a midi e speelplaats pa e siguiente proyecto.  Durante contacto cu e docentenan di scol, nan a pidi buki di Ingles y material pa lesnan di arte.  Colegio San Antonio a traha duro pa cumpli cu nan peticion y trece esakinan como muestra di aprecio.

   Despues di un treat unda e alumnonan a haya pan de bono y koffie traha cu awa panela, nan a cambia paña pa haci e parti di trabao boluntario. Aki nan a join e alumnonan di Policarpa Salavarietta y pinta gran parti di e speelplaats.

Ora a papia cu e alumnonan Colombiano di nan impresion, nan a indica cu nan a keda asombra cu e nivel di Ingles di e alumnonan di Aruba. Algo sigur di balora.

   Despues tur alumno a join otro pa almuerzo na e finca caminda nan a hunga futbol y disfruta di e pool. (E partido di futbol a finalisa 5-3 pa e team di San Antonio).

   Tur docente a haya un dushi drigidek y alumnonan a haya cuki di lerchi for di e grupo di Aruba durante di e intercambio.

   Colegio San Antonio ta yama danki na e Rector sr. Henry y docentenan Carlos y Leidy pa habri porta pa e muchanan y laga nan disfruta di un experiencia inolvidabel.