ORANJESTAD (AAN): Recientemente DIARIO a entrevista Altocomisario Ramon Arnhem, riba e periodo di campaña y eleccion cu Aruba ta aden.
El a splica cu e ta realiza cu e ta un periodo cu hopi tension, unda cu tur hende kier trece dilanti nan puntonan di bista. “Te ainda tur cos ta cana bon”.
Ta den contacto cu tur e lidernan di partido y nos a haci bon palabracionnan cu tur, segun Arnhem, kende a bisa cu e ta di acuerdo cu e hecho cu locual a sosode entre MEP y AVP no tabata mucho bunita.
“Den casonan asina nos lo actua, pero mi ta contento cu e partidonan ta scucha locual nos a palabra cu nan y por lo general ta tene nan mes na e palabracionnan”, segun e Altocomisario.
El a sigui bisa cu den e periodo aki tur hende ta emociona y ta den tension, pero tur hende kier pa tur cos sigui cana bon.
A puntra e Altocomisario di agentenan policial ta bay ta presenta na e diferente actividadnan politico y el a bisa cu si.
Segun Arnhem cuerpo policial lo haci nan best pa mantene ordo y actua ora cu esaki ta necesario.
E parti importante ta pa tur hende mantene nan mes na e palabracionnan, pa asina mas posibel evita cualkier problema of confrontacion.
