Alimentos Aruba 2026 ta fortalece relacion comercial entre Aruba y Colombia

Consul di Colombia, Gustavo Serrano Amaya:

ORANJESTAD (AAN): Consul di Colombia, Gustavo Serrano Amaya, a duna un entrevista na DIARIO tocante Alimentos Aruba 2026, un evento unda productornan y comerciantenan Colombiano ta presenta nan productonan na mercado Arubano.

   E showroom, cu ta celebra su di tres edicion actualmente na Aruba, ta brinda un oportunidad importante pa acerca Aruba y Colombia ainda mas den area comercial.

   Durante e evento, empresarionan local por conoce diferente producto Colombiano y explora oportunidadnan nobo pa importacion y colaboracion comercial.

   Segun Consul Serrano Amaya, e productonan cu e productornan Colombiano ta ofrece na Aruba ta distingui nan mes pa nan calidad y frescura, ademas di ta apropia pa necesidadnan di mercado Arubano.

  Colombia tin miles di producto y e seleccion presenta durante Alimentos Aruba 2026 ta solamente un muestra di e variedad cu e pais tin di ofrece. Cu mirada riba futuro, intencion ta pa amplia e tipo di evento aki y inclui mas categoria y linea di negoshi.

   Consul Serrano Amaya a splica cu ProColombia ta un entidad di Estado Colombiano cu ta forma parti di Ministerio di Comercio, Industria y Turismo. Su funcion ta promove productonan Colombiano, inversion y turismo, tanto internacionalmente como den mercadonan cu tin potencial pa crecemento.

   ProColombia tin planea pa sigui organiza e showrooms aki tur aña y haci nan cada biaha mas amplio. Ademas di alimento, e organizacion ta desea pa presenta otro sector y linea di negoshi. Un ehempel ta e evento organiza na december di aña pasa, cu tabata enfoca riba materialnan pa construccion.

  “E idea di ProColombia ta pa cada biaha organiza showrooms di diferente tipo di producto. Manera a wordo indica, Colombia ta un pais rico den fabricacion di un gran variedad di producto,” Consul Serrano Amaya a expresa.

   Cu iniciativa manera Alimentos Aruba 2026, ProColombia ta sigui crea oportunidadnan pa productornan Colombiano conecta cu mercado local, mientras cu empresarionan y consumidornan na Aruba ta haya acceso na mas producto di calidad. Na mes momento, e evento ta contribui na fortalecemento di e relacion comercial y economico entre Aruba y Colombia.