Alfredo Koolman escogi pa bira Director nobo di WEB Aruba NV

ORANJESTAD (AAN): Decision a cay, y un Director nobo a wordo nombra pa e compania di awa y electricidad na Aruba.

   Ta cu gran satisfaccion cu Utilities y WEB Aruba a anuncia na pueblo di Aruba cu un candidato yiu di tera, un profesional Arubiano, ta cla pa tuma e rienda di nos compania estatal esta WEB Aruba N.V. entrante 15 di Mei venidero.

   Esun escogi ta Alfredo Koolman, un ingeniero di formacion, cu su titulo di Master den Ciencia, kende desde 2013 a maneha WEB Bonaire. Anteriormente, Sr. Koolman tabata empleado di WEB Aruba den diferente posicion clave manera Division Manager Maintenance y Division Manager Waterdistribution. Sr. Koolman a traha na Hulanda tambe den mesun ramo. Un candidato cu experiencia amplio cu a resulta e miho den e proceso y scrutinio pa proximamente bira e Director General di WEB Aruba.

   E proceso tabata uno transparente, cu avisonan den nos corantnan local. Tabatin un total di 22 persona cu a reacciona riba e aviso, pero Sr. Koolman ta esun cu a resalta y sobresali den henter e proceso di reclutamento y seleccion.

   Utilities y WEB Aruba ta gradici Sr. Koolman pa asumi e reto mirando cu e ta lagando atras un bon trayectoria na WEB Bonaire, pa bin aporta na e desaroyo di nos compania estatal cu awor ta den e proceso di transformacion pa cambio di energia sushi pa energia limpi LNG rumbo Hydrogeno.

   Utilities y WEB Aruba ta gradici Sr. Laty Wever enormemente pa a acepta e reto y a asumi responsabilidad di WEB Aruba N.V. kende a sa di maneha e planta aki di un manera admirable durante su gestion. Awor un era nobo ta inicia pa WEB Aruba N.V.

   E compania y DIARIO ta desea Sr. Koolman hopi exito den su gestion como e director nobo di nos planta nacional di awa y energia WEB.