Alexia Chin di Aruba eligi como Miss Internacional de los Mares y del Turismo

ORANJESTAD (AAN): Recientemente, e reina di Aruba cu a caba di cosecha exito na Costa Rica a yega bek su isla.

   Alexia Chin a keda eligi como e ganadora maximo na e certamen cu a tuma lugar na Tambor Beach na parti di pacifico di Costa Rica, e certamen di Reina International de los Mares y del Turismo, na cual diferente candidata a participa den diferente categoria.

   Aruba a manda Alexia Chin, kende na 2019 a sali un di e finalistanan di e certamen di Miss Youth Aruba.  Cu su preparador Roberto Avalo y delegacion di famia, y organizador local, el a ricibi un fabuloso apoyo durante e dianan cu e tabata eynan.  Dado momento hasta e turistanan cu ta hospedando na e resort, a cuminza dune apoyo.  Esey por a nota hasta e anochi di certamen.

   E certamen final mes a tuma lugar den Ballroom di Barceló Tambor, unda a ora cu a anuncia Aruba como ganadora, por a nota cu hasta demas turistanan den publico a cuminza grita di alegria.

   Demas premio cu Alexia Chin a logra na e certamen ta, e premio di “Mihor Fashion”, tambe “Mihor Trahe di Fantasia”, “Mihor Silueta”, y “Mihor Modelo”.

   Na su yegada na Aruba, Alexia a splica cu di hopi tempo su deseo tabata pa e bay competi pa un certamen internacional di beyeza.  Pues su participacion na Costa Rica tabata un soño cu a bira realidad, y cu orguyo el a carga e nomber di Aruba.

   “Semper mi tabatin e bandera den mi man,” Alexia a indica na DIARIO den un entrevista na su yegada.  E ta referi aki na e banderin chikito cu e tabata cana tur dia cune, den tur skina cu el a acudi.

   Pesey mes den tur potret cu a wordo saca di dje, bo por mire cu e bandera den su man, pasobra Aruba ta su isla cu e stima masha hopi.

   Awor e ta bay disfruta di su 9 luna di reinado como Miss Internacional de los Mares y del Turismo, como cu na Mei 2022 e tin di bay baha corona bek. 

   Su deseo pa futuro?  Di por bay representa  Aruba na certamen di Miss Universe.