CALI: E evento di ‘Fiestas del Verano de Calima’ na pueblo di Darien cu ta keda como 50 km panort di Cali,
a finaliza na un forma hopi bochornoso. Esey ta despues cu e mandatario principal di municipio Calima, esta Martín Mejía Londoño bao estado burachi a subi podium net unda e artista Juan Carlos Hurtado tabata cantando. Unavez riba escenario, el a kita e mic di dje, y a papia un cantidad di cos grosero, incluyendo “cu mi ta un ladron”.
E mandatario tabata visiblemente bao influencia di alcohol, y riba stage dilanti miles di hende, el a bisa e artista: “Ami ta politico... mari••. O sea, mi no tin nada di haber aki riba.” Despues di esey, el a sigui bisa: “Pasobra mi ta un ladron”.
Ora cu e cantante a tende esey, y dilanti e actitud grosero di e Alcalde, unico cos cu el a contesta tabata: “Ahhh, esey mi no sa.” Pa colmo e evento tabata wordo transmiti en vivo via plataformanan digital di e Alcaldia mes, y e publico presente a cuminza boe e mandatario, kende a sigui papia cu tono brutal.
“Na Calima Darien e artistanan ta gratis, nan no ta pa e riconan... mi a gasta 450 miyon di Pesos riba boso jue••ta..”. Aki e tabata mustra riba publico, referiendo asina na e placa cu el a inverti den e conciertonan di fin di siman cu a pasa.
Te cu awor, ainda e Alcalde no a reacciona riba e incidente bochornoso aki cu el a laga tur hende mira riba podium. E eventonan mes di Fiestas de Verano, a caba cu un cantidad di bringamento cu habitantenan burachi den e parke principal.
