Alarma grandi pa candela feroz na un motor RECIP den WEB

Bon trabao di WET Team y Bomberonan di Aruba

 *Generacion di coriente no a wordo afecta pero a bira delicado 

ORANJESTAD (AAN): Ora cu a cuminsa realisa cu e sistema di usa Boiler pa produci vapor pa por draai turbinanan di generador na WEB Aruba NV lo bay ta yegando un epoca di bira obsoleto, e tempo ey WEB a cuminsa anuncia cu nan ta pensa di cuminsa haci uso di motornan cu ta ser yama RECIP, como cu nan ta mucho mas eficiente den uso di combustibel pa genera coriente.

   Esaki a bira solamente ora cu e plantanan di desalinacion di awa a cambia for di vapor, pa esun di SWRO (Salt Water Reverse Osmosis) cu tabata un tecnologia nobo cu a pone tur e otro plantanan di awa bira obsoleto.  Planta di SWRO no ta usa vapor, pues e sistema di Boiler por wordo elimina pa semper.

   Na su lugar a bin RECIP pa yuda genera coriente, y e coriente aki lo bay ilumina cas y negoshi di tur hende, y e coriente lo opera planta di SWRO.

   E mashin cu su “malesa”:  RECIP ta un mashin grandi, complica, pero cu ta hopi eficiente pa yuda genera electricidad.  Sinembargo for di prome biaha cu a cuminsa opera e motornan aki, pues e asina yama ‘Reciprocating Engines’ cu ta wordo abrevia como RECIP Engines, tabata conoci cu nan tin un riesgo grandi di pega candela si acaso algo bay malo.

   E tabata un problema asina grave, te cu e organizacion internacional di ISO (International Standards Organization) a dicidi cuminsa yuda pa bin cu protocol y reglanan pa asina introduci cierto rekesito riba e motornan di RECIP aki, pa minimalisa e riesgo di candela ocasiona door di e tipo di motornan aki, of nan componente, y e tuberia y demas ekipo conecta na dje.

   Asina a introduci monton di standardnan cu fabricantenan y usuarionan di motor RECIP tin di cumpli cune, incluyendo slangnan di combustibel cu ta resistente na candela, rekesito pa sistemanan permanentemente instala di combustibel.

   Reduci riesgo: Den pasado ya caba DIARIO a yega di publica extensivamente riba e peligro di motornan RECIP, y cu WEB Aruba NV tambe ta na altura di dje, y hunto cu e fabricante Wärtsilä di Finlandia a dedica hopi estudio, proyecto, y experimento pa minimalisa e peligro aki di candela cu tabata aparece hopi biaha inespera ora e motornan aki ta funciona.

   Analisando e centenares di candela cu a keda registra rond mundo cu motornan RECIP, a dicidi na introduci cambionan pa asina haci e motornan aki mas safe, y minimalisa e riesgo di pega candela.  E compania Wärtsilä a logra di haci esey na un forma cu nan mes ta orguyoso di loke a haci.

   Candela den WEB: Pero keto bay ta demostra cu e sistema no ta completamente “fool-proof”, y esey a socede Diamars merdia poco despues di 2:15 pm alarma a ser bati, despues cu hendenan a tende sonido fuerte.  Diripiente huma diki, preto, y na cantidad enorme a cuminsa sali for di e edificio unda tin varios motor RECIP instala riba tereno di WEB Aruba NV.

   Alarma a wordo bati!  Esaki a ser haci internamente, como tambe na Cuerpo di Bombero tambe, y mesora un monton di unidad a subi caya y cu urgencia a acudi na WEB Aruba NV na Balashi.

   Desde aña 2007, e compania a crea loke ta ser yama ‘WEB Emergency Team”, cu ta wordo yama e “WET Team”.  E ta un ekipo consistiendo di diferente empleado, kendenan a haya extra curso y training pa asina brinda servicio di emergencia ora cu esaki socede den e planta.  Pues riba Diamars atardi, e WET Team aki tambe a drenta den accion.  E bon  ta cu nan tur tin amplio experiencia y a ricibi les riba con pa atende candela na un motor RECIP.

   A bin resulta cu Motor RECIP #7 a sufri un desperfecto grandi, y unavez cu combustibel haya contacto cu algo cayente hunto cu oxigeno, esaki a start un candela.  E Motor RECIP #7 a wordo desconecta mesora, y e otro plantanan a logra “recupera” e energia cu a bay perdi.  Pues coriente a bay ningun caminda na Aruba, danki na sistemanan automatisa y e profesionalismo di esnan trahando den Control Room di WEB Aruba NV.

   Despues di a stabilisa e demas plantanan, e meta primordial a bira pa bay salvaguardia e otro plantanan, y tambe paga e candela na RECIP #7 aki.

   Un rato despues cu Bomberonan a yega, den algun minuut ya caba por a mira cu e huma preto a bira menos, y despues ya a paga.  Bomberonan e ora a djis bay pa ‘nablussen’ di e candela hunto cu e WET Team di WEB Aruba NV.

   Investigacion: Awor un investigacion grandi lo bay wordo haci, como cu WEB Aruba NV ta exigi un rapport completo di cualkier incidente riba su tereno.  Aki lo ricibi yudansa di expertonan cu ta analisa tur loke a socede prome, y durante di e candela.  Fuera kizas lo bay check tambe si e sistemanan instala pa “suprimi candela” tambe a activa of no.

   E bon noticia ta cu ningun hende a resulta herida den e candela aki, y esaki tin di wordo subraya cu tur empleado a sa di sigui e draaiboek ora cu algo asina socede cu motor di RECIP.

   WEB Aruba NV den un boletin chikito a splica cu e situacion di produccion di coriente ta bao control ainda, aunke a usa e palabra “delicado” den e informe.  Pues e situacion por sigui normal, pero si cualkier storing grandi presenta, e lo por afecta suministro di coriente.