Alarma falso di Bom a ocasiona caos completo na Aeropuerto

Pasahero a descubri nota net prome cu avion tabata aterisa

• Avion di jetBlue for di Boston a keda para banda di pista 

ORANJESTAD (AAN): Henter Dialuna merdia pa atardi e situacion normal di trabao a cambia cu 180 grado na Aeropuerto di Aruba.  E situacion a presenta ora cu un avion Airbus A321 di jetBlue a caba di ateriza riba un vuelo for di Boston (Massachusetts) na Merca.

   E prome yamada: Tabata exactamente 12:45 pm cu vuelo 743 a drenta den contacto cu Toren di Aeropuerto Internacional Reina Beatrix pa informa cu nan ta den final approach pa pista 11.  Toren a contesta pa nan sigui cu e aterizahe, biento ta suplando di pariba cu 18 nudo.

   Aki e personal di cabina a informa Aruba, cu un stewardess a caba di entrega na nan un nota cu un pasahero a descubri banda di su asiento cu ta indica cu lo por tin un bom abordo di e avion.  Pilotonan a informa esey, pa mustra nan cu den situacion asina, no ta bon pa nan bay staciona nan avion na Gate ora cu nan caba di ateriza.

   Mesora Aeropuerto a bati alarma, y pone tur instancia na altura.  E avion cu 189 persona abordo, tabatin ainda 2 ora di jetfuel abordo.  E avion a wordo ordena pa ora di caba di ateriza, nan bay te na e final di pista, y drenta na taxiway ‘Alpha’ y stop eynan.

   E avion jetBlue vuelo 473 a ateriza cinco minuut despues, esta pa 12:50 pm, y a bira y para mesora despues di a sali di pista. Un avion cu tambe ta yegando Aruba e momento ey, esta un American Airlines procedente di Philadelphia, sa cu ora algo asina socede cu Aeropuertonan lo bay cera pa seguridad, y mesora a haci e pregunta si vuelonan por sigui baha.  Poco despues pa 12:55 pm nan a wordo informa cu Aeropuerto ta cera.

   E avion di jetBlue 473 a para na entrada di Taxiway Alpha cu cockpit dirigi panort.  Mesora a start e draaiboek y esaki ta inclui tur protocolnan di siguridad, y e situacion ta wordo maneha pa e autoridadnan apropia. A core notifica Polis, cu a manda diferente patruya, y tambe a notifica personal di Marinierskazerne cu ta encarga pa busca cualkier bom.

   For di 1:00 pm mesora Aeropuerto di Aruba a declara cu nan ta cera pa e emergencia aki.  Esey nifica cu ningun avion mag di move mas riba plataforma, ningun mag di ateriza, y tampoco ningun vuelo lo por subi.

  Pero banda di 1:20 pm ainda paden di terminalnan di US Bound tabata check-in pasahero, pero poco despues a drenta e notificacion pa tur hende sali, y cu servicio ta wordo suspendi temporalmente, mientras cu ta atende e emergencia riba pista.

   A bay pone un trapi dilanti di e avion, y cuatro bus a bay pa asina baha e pasaheronan.  Varios vehiculo di Security, y tambe di Polis a rondona e avion.  Hasta e pilotonan a baha di e avion.  Tur maleta a wordo baha y poni riba e tereno habri di rampa pa asina revisa nan.

   Mientras tanto, e area dilanti Aeropuerto a yena cu pasaheronan cu mester a sali di e terminal y keda pafo te ora cu e emergencia finaliza.

   Vuelonan a desvia: Mientras tanto tabatin diferente vuelo cu tabata den aire caba yegando Aruba.  Aki DIARIO ta trece detaye di algun di nan.

   American Airlines vuelo AA-870 cu ta un Airbus A321 procedente di Philadelphia, a bay den patronchi di espera pabao di Aruba, esey nifica cu el a keda bula den ronchi stipula pa Air Traffic Control.  Despues di un rato, e capitan a opta pa desvia y ateriza na Curaçao.

   American Airlines vuelo AA-887 cu ta un Boeing 737 for di Charlotte, a bay den patronchi di espera pabao di Aruba, pero debi na jetfuel hopi abao, a pidi pa bay ateriza na Curaçao.

   Delta Airlines vuelo DAL-613 cu ta un Airbus A321 for di JFK Airport na New York, a bay den patronchi di espera pabao di Aruba.

   United Airlines vuelo UAL-1203 cu ta un Boeing 737 Max-9 procedente di Washington DC, tambe a bay den patronchi di espera pabao di Aruba.  Despues di basta rato, e tambe a desvia pa Bonaire.

   American Airlines vuelo AA-2217 cu ta un Boeing 737 procedente di Miami, tambe a bay den patronchi di espera pabao di Aruba.  Despues el a desvia pa Bonaire.

   Southwest Airlines vuelo WN-1443 cu ta un Boeing 737 procedente di Orlando, a bay den patronchi di espera pabao di Aruba, pero rapidamente despues a desvia pa Curaçao.

   WestJet vuelo WS-2196 cu ta un Boeing 737 procedente di Toronto, a wordo desvia pa Punta Cana (Republica Dominicana).  E no a ni yega cerca di Aruba.

   United Airlines vuelo UAL-1042 cu ta un Boeing 737 Max 9 procedente di Newark (New Jersey), a wordo desvia pa San Juan (Puerto Rico).

   Aeropuerto habri bek: Banda di 4:20 pm, despues di casi 3 ora y mey porfin rampa di Aeropuerto di Aruba a habri bek.  Pista di aterizahe a habri pa 5:00 pm.  Pasaheronan por a drenta atrobe bek den terminal, y e avion di jetBlue a wordo pusha dilanti na Gate.  No a haya nada di explosivo abordo di e avion.  Pa 4:43 pm mes, American Airlines AA-874 a lanta vuelo bek for di Curaçao pa asina yega Aruba pa 5:09 pm.

   Un avion di Divi Divi Air a bira e prome cu a lanta vuelo bek pa 4:49 pm rumbo pa Curaçao.

   Kende lo por a pone e nota di Bom aki abordo?  Kizas por ta un hende a haci joke den e vuelo door di pusha e nota bao asiento.  Of kizas e vuelo anterior cu jetBlue a uza prome cu e aparato a yega Boston, lo tabatin un hende cu a haci e joke ey y lage atras.  Y ta e vuelo rumbo pa Aruba di Dialuna mainta, un pasahero a bin haya e nota.

   Un situacion fuera di control di Aruba, pues e nota tabata abordo di e avion prome cu el a ateriza.  El a perhudica mayoria di aerolinea cu a keda stagna, y otronan cu mester a desvia pa aeropuertonan alternativo.  Despues di 5:00 pm ta monton di avion a cuminza ateriza, cu a nifica extra trabao pa Groundhandlers, y tur personal.  Hopi pasahero disgusta cu nan lo a perde nan vuelo di conexion den exterior.