Alarma bati na Bombero ora cu dak di Kapel Huan Pablo II na Tanki Leendert a cuminza kima

Trabao di instalacion di loderiet a bira complica

ORANJESTAD (AAN): Un atardi di trabao di haci reparacion riba e Kapel Huan Pablo II na Tanki Leendert, na dado momento a tuma un rumbo indesea, net un poco despues di 7:30 pm.

   Na momento cu algun tecnico riba e dak di e Kapel tabata haciendo e trabao di instala shingles/loderiet, usando torch pa esaki pega riba e dak, diripiente a cende parti di e infrastructura di dak.

   Na momento cu e unidad di Bombero a yega eynan, a bin topa cu Ambulans caba ta atende un persona cu lo a ricibi herida.  Bomberonan a rek cara na halto y a mira huma riba e dak.

   Mesora Bomberonan a rek trapi pa asina bay halto cu un slang di awa, pa asina cuminza paga e candela.  E parti di palo di e dak tabata kimando, y Bomberonan a dicidi pa keda basha awa riba dje pa mas di 15 minuut largo pasobra e pidanan aki di biga diki no ta paga rapidamente.

   Hopi daño di awa: Consecuencia di esey a cu masha hopi awa a keda basta parti pafo net dilanti e porta grandi, y tambe na e parti paden, incluyendo e pida unda tin e hoki chikito unda ta keinta awa pa coffie.

   Un poco despues di 8:00 pm, e trabao a finaliza, y Bomberonan a baha bek for di dak.

   Varios boluntario a yega despues pa asina yuda mop tur e awa cu a basha bay parti paden di e Kapel.  Aunke e ta un trabao cu a dura basta e anochi ey, toch nan ta contento cu e daño di candela a keda limita.