CEO di AHATA Tisa LaSorte:
- Den esnan no registra e problema ta sinta
ORANJESTAD (AAN): CEO di Aruba Hotel And Tourism Association (AHATA), señora Tisa Lasorte, den entrevista cu Matutino DIARIO, a declara cu semper nan ta keda preocupa pa tur hende den tur sector paga impuesto, pa por tin un competencia cu ta real, husto, honesto y sincero.
“Anto, loke nos ta mira di vacation rentals (Airbnb) ta cu tin ainda un falta di cumplimento completo di pago di impuesto. Nos ta compronde cu nunca ta 100% e cumplimento, pero bo mester yega na un cumplimento halto di impuesto pa tur hende tin e mesun gastonan. Si tur hendenan tin e mesun tipo di gastonan, bo ta pagando bo electricidad, e tarifanan comercial, tur bo impuestonan, e ora ey bo ta igual den e competencia di mercado”, señora La Sorte a duna di conoce.
CEO di AHATA a agrega cu nan sa cu Airbnb tin hopi ainda cu no ta registra y no ta pagando impuesto.
“|Nos sa cu gobierno tin atencion den esey y Departamento di Impuesto tambe; den varios reunion nos ta papia di con nos por yuda cu cumplimento, nos sa cu ATA ta purba yuda hopi tambe pa cu cumplimento, y nos ta ripara tambe cu den entrevista cu enberdad e ta papia di e cumplimento mas halto, y ta papiando di un porcentahe di cumplimento di ‘turisten heffing’ por ehempel. Pasobra nos no ta papia di ‘turisten heffing’solamente pero tambe tin inkomsten belasting, pues tin hopi impuesto cu tin cu cobra ainda di e sector”, Tisa Lasorte a comenta.
El a agrega cu el a ripara cu a falta di e datonan cu a wordo duna den e entrevista, ta papia di un 90% di cumplimento di ‘turisten heffing’, por ehemplo. “Pero nos mester corda cu esey no ta henter e historia. Esaki ta solamente di esnan cu ta registra. Loke nos ta haya falta ta cu tin hopi compania cu tin apartamento of cas cu ta funciona den e sector di Airbnb cu no ta registra, y eynan e problema ta sinta”, CEO di AHATA, Tisa LaSorte a remarca.
