Magaly Brito, SEPPA:
- Esaki ta otro punto di discusion
ORANJESTAD (AAN) Magaly Brito, Secretario General di Sindicato di Trahadornan Publico y Priva (SEPPA), a bisa den entrevista cu DIARIO cu otro aspecto cu e placa cu nan a retene di trahadornan di empresanan estatal, ta algo cu empleadonan di Arubus nunca a haya bek, y esey ta otro punto di discusion.
Esaki ta referi na e tempo di e pandemia (Covid-19) y cu ta keda riba mesa pasobra e trahadornan ta puntra ki dia gobierno ta devolve nan e placa aki.
E trahadornan di Arubus ta sinti’e pasobra mientras gobierno a duna 11.7% pa empleadonan publico y fundacionnan, cu loke SEPPA ta contento cu esey, eigenlijk no ta completo.
“Esaki den sentido cu empleadonan di empresanan estatal tambe mester haya un ahuste den nan salarionan, y e 11.7% tambe ta loke e trahadornan ta pone como deseo. Pero di otro banda, e structura salarial ta un tema cu nos tin hopi aña riba dje, tin acuerdo cu e ta bay mehora y bin cu algo riba mesa, cu e trahadornan por biba cu ne, pero esey no a sosode y na cierto momento Arubus ta bisa cu na 2022 el a djis implement’e, locual no ta corecto pasobra nan sa cu tabata tin obhecion contra dje”, Brito a subraya.
El a agrega cu ultimo ainda, cu SEPPA tabatin reunion cu Gobierno, e minister a duna e sindicato razon cu ta parti di e salario pero no por a implement’e. “Ami a bisa cu mester sigui cu negociacion te logra algo husto pa e trahadornan”, Magaly Brito, Secretario General di SEPPA, a remarca.
