Ainda tin te fin di luna pa participa den e campaña "Social Selfie Contest' di Stichting BOB

Ta hopi importante pa papia mas riba e tema di cancer di pecho

ORANJESTAD (AAN):   Den cuadro di e luna di concientisacion riba cancer na pecho, Stichting BOB Aruba a lansa un campaña durante henter luna di October cu yama 'Social Selfie Contest'.

            PR & Marketing Officer di Stichting BOB Aruba, Diantha Nüesch a indica den entrevista cu DIARIO cu esaki ta un concurso caminda e participantenan por gana premio. Ta hopi facil pa participa.

Esnan cu kier participa tin cu bay na  un tienda of establecimento cu a 'join' e campaña caminda tin un 'donation station' cu e 'donation box' di BOB.

            E intencion ta cu si un persona kier participa e ta deposita un suma (boluntario) y ta saca un selfie na e 'donation box' . E selfie mester wordo publica riba social media y tag Stichting BOB pa asina por confirma e participacion y haya chens di gana premio.

Tambe mester 'hashtag' e tienda of establecimento caminda a haci e donacion, ya cu nan ta sponsor di e premionan, Nüesch a señala.

            E premionan ta varia di un balor entre 50 Florin te cu 500 Florin. "E ta hopi nice pa hende haci un donacion, pero tambe pa papia over di e topico. Bo por participa cu amiganan, cu bo mama, cu bo ruman, familiar, cu bo yiu. Dus papia over di e topico pa concientisa. Esey ta e  meta principal grandi di e campaña, pero alabes bo por gana premionan hopi leuk", a indica.

Tin henter e luna di October pa participa.

            El a agrega cu luna di October ta mundialmente conoci como e 'Breast Cancer Awareness Month' y aki na Aruba toch tin un tabu ainda. Kizas hopi hende muher no ta participa of si nan participa nan no ta papia riba e tema cu amiganan, famianan of hasta nan yiunan.

            Pesey ta hopi importante pa papia mas riba e topico pa e generacion mas jong tambe crece consciente cu chekeo di pecho ta hopi importante y normal pa haci, no solamente un biaha sino cada 2 aña, Diantha Nüesch a remarca.

            El a bisa cu den luna di November e ganadornan di e campaña lo wordo anuncia.