Ainda tin chens pa inscribi pa Torneo di Pesca Hadicurari

Tur dia na oficina di Hadicurari

ORANJESTAD (AAN): E reaccion di piscadonan tabata grandi, y esey a haci Arthur Giel contento, kende ta president di Fundacion Centro di Pesca Hadicurari.  Nan famoso Torneo di Pesca lo bay ta Diasabra awo 15 di Augustus 2026 na oriya di lama banda di Hadicurari.  E biaha aki e lo ta un colaboracion cu Santa Rosa y tambe Aruba Wine & Dine.

   Diabierna anochi na Centro di Bario Noord a tuma lugar e Captain’s Meeting, unda cu hopi hende a acudi pa asina inscribi nan mes, pa asina ricibi nan pakete y tambe nan T-Shirt pa bisti e dia ey.

   Tin tanto ‘Team Chikito’ cu ta di 3 persona, y tambe ‘Team Grandi’ cu ta di 5 persona participando.  Si acaso bo no a haya chens di inscribi na e Captain’s Meeting, anto henter e siman aki por inscribi na oficina di Hadicurari, pero esey ta di 9:00 am te cu 3:00 pm.  Pues e deadline e ora ta bira Diabierna awor 3:00 pm.

   Riba Diasabra e evento grandi lo ta cant’i lama, unda lo tin Fish Fry, y chefnan di Wine & Dine lo ta cla pa prepara platonan.  Publico lo por yega di 11:00 am te cu 6:00 pm.  Entrega di premio lo bay ta pa 5:00 pm.

   Debi cu e parkinglot y e caminda di Berea di Piscado lo bay ta cera, ta sugeri tur hende pa staciona den area di Sarah Quita Beach (banda di Fisherman’s Huts).  Aki lo bay tin e bus di Kuko Kunuku funcionando como shuttle, cu ta coriendo for di Sarah Quita Beach pa trece huespednan pa Hadicurari, y vice-versa.  E bus lo core cada 15 minuut.

   Segun Giel, e biaha aki lo bay tin banda musical, dak grandi pa hende sconde pa solo, animacion di DJ, cuminda, y tur hende lo goza di e torneo aki.

   Riba potretnan aki pa cortesia di Centro di Pesca Hadicurari, por mira mas di e reunion di capitannan.