Stof di Sahara lo sigui stroba visibilidad - ORANJESTAD (AAN): Departamento Meteorologico di Aruba a informa diadomingo atardi cu e situacion general di tempo pa proximo oranan lo ta e siguiente.
Humedad disponible den atmosfera regional lo pone cu temporalmente mas nubia lo por pasa riba region local. Esaki lo produci un awacero pasahero te breve localmente cu tambe un chance pa lamper cu strena.
Mas leu stof fini di Sahara lo stroba visibilidad un poco durante proximo dia of dos.
Condicionnan maritimo/ estado di lama:
Ta spera un estado di lama leve na partinan proteha, y modera na partinan zuid. Na partinan oost te noordwest lama lo ta generalmente modera cu olanan entre 4 pa 6 pia.
Aviso/ alerta:
Na operadornan di boto chikito ta wordo sugeri pa sigui bay cu cautela na partinan oost te
noordwest di area costero y lama habri.
Tambe ta sugeri pa evita areanan di awacero of lamper y strena ya cu lama lo bira temporalmente hopi bruto akinan.
Tempo tropical significante:
Horcan Ida tabata situa zuid- zuidwest di New Orleans, Louisiana y ta move noordwest. Ida no ta un peliger pa region local.
Depresion tropical nr. 10 ta situa oost di islanan ariba y ta move noord. Nr. 10 ta solamente un estorbo pa navegacion maritimo.
Un area di presion abou den Atlantico Central, oost di Bermuda a sigui desaroya y bira tormenta tropical Julian. Julian tabata situa west di Azoren y ta solamente un molester pa navegacion maritimo.
