Ainda lo tin espacio pa inscripcion di mucha na EPB

Cabesante Erwin Lopez ta splica

Den un entrevista cu señor Erwin Lopez, Director di EPB Oranjestad, el a menciona cu e inscripcion pa e aña escolar nobo (2024-2025) ta bayendo bon. Lopez a bisa cu e tin su retonan si, pasobra ta pa prome biaha cu scol ta registra online, y e ta pidi mayornan un tiki pasenshi.

Den vacancy e sistema a cera, pero e ta bay habri bek. Esnan cu kier inscribi por hacie ainda, vooral e muchanan cu ta bin di MAVO, pasobra pa esnan di MAVO e cuponan ta limita e aña aki.

“Esaki debi cu tin un scarcedad di maestro; ta hopi dificil pa haya maestro, kiermen si bo tin espacio den local, no tur ora bo por habri espacio si no tin hende pa traha”, Cabesante señor Lopez a bisa.

El a agrega cu muchanan cu ta bin Eerste Klas di Mavo ta bay Tweede Klas na EPB, pues nan ta ok, nan tin lugar na scol, kiermen nan por drenta libremente. Esnan cu ta bin di Tweede pa drenta Derde, tin cu haci un escogencia. Por ehemplo, pa Koki, espacio ta yen caba. No t’asina cu tur mucha cu ta bin EPB por scoge tur opleiding. Esnan di MAVO ta loke resta nan ta haya, y esnan cu bin prome ta haya mas choice, meneer Lopez a menciona.

Lopez a splica cu scol ta hayando mas y mas alumno atrobe, y e ta contento cu esey pasobra e mercado laboral ta pidi mas trahado y EPB ta un di e poco scolnan cu ta suministra nan, banda di Colegio EPI.

“Y tambe mi ta kere cu, pa e muchanan di MAVO, of muchanan cu ta bay scol basico, eigenlijk, mi lo prefera pa bin akinan di biaha, y no pasa un ronchi MAVO y despues end op akinan”, meneer Lopez a acentua.

El a aclarea cu nacionalidad di e alumno no ta haci mucho diferencia, tanten nan tin nan papelnan na ordo. “Nan tin cu presenta papel di censo di 5 florin, passport, acta di nacemento pasobra scol mester sa ken ta e mucha su mayor, pa ora di inscripcion si bo tin nan na orden e ta bay hopi lihe”, Cabesante Erwin Lopez a expresa.

El a comenta cu tin mayornan tin problema pa load up e informacion y tin di nan a wordo yuda prome cu scol a cera. “Nos personal no a cuminza traha ainda, kiermen nos ta hacie solamente digital”, el a splica.