Ainda falta un 200 boluntario pa yuda den proyectonan di Aruba Doet

Coordinador Pauline Termulen:

ORANJESTAD (AAN) – Pauline Termulen, Coordinador di Aruba Doet, den entrevista cu DIARIO a bisa cu e aña aki ta e di 13 biaha cu tin Aruba Doet, cu 160 proyecto pa ehecuta.

Mayoria di e proyectonan aki ta riba Diasabra y si tur proyecto ta yen, tin 3.500 boluntario trahando na tur e proyectonan, pero ainda falta un 200 hende pa Diasabra.

“Nos tin na Colegio San Antonio, Grupo Scout Sint Dominicus, Special Olimpics Aruba, na Little League cu den nan cancha mester di hende ainda. Por subi e website arubadoet.com y eynan por wak tur e proyectonan cu mester di hende ainda”, Termulen a indica.

El a agrega cu tur hende cu no a registra ainda, pero cu kier duna un man pa yuda nos comunidad, por subi e website menciona wak e proyecto cu nan gusta y yuda cu Aruba doet.