Segun Jayburtt Dijkhoff:
*Loke a sosode recientemente den cierto sentido ta bon, pa concientizacion di pueblo!
ORANJESTAD (AAN) –Jayburtt Dijkhoff, di Instituto di Calidad Aruba, den entrevista cu DIARIO a señala cu loke a sosode riba tereno di cuido di boca, recientemente, toch ta algo bon den cierto sentido, pa concientizacion di pueblo.
El a bisa cu kizas ainda, den pueblo tin e nocion di bay na un caminda mas economico, miho pa e cartera, of kizas door di un tiki desconfianza cu esun cu ta estableci caba, pero manera un dicho na Spaño ta bisa: “Lo barato sale caro”.
“Esey ta loke recientemente nos a mira riba salud oral (salud di boca), y esey ta pasa tambe den diferente practica di Medicina. Hende ta bisa cu a haya contacto cu hende cu ta bin di afo, ta cobra mas barata, nan ta bay na e lugar y despues kico nan ta confronta cu ne? Un situacion cu, por ehemplo, nan ta haya un infeccion inespera. Nan ta haya nan mes cu dolor, cu un situacion cu mester wordo coregi, anto ken ta bay coregi? Otro persona cu si ta registra na Instituto di Calidad, cu a pasa e credencialnan necesario, anto esey ta algo cu nos a purba di concientiza pueblo. Si bo persona kier ta sigur cu un persona a pasa su screening debido, cu por atende pashent, cu tin e calificacionnan necesario, semper por yama nos na Instituto di Calidad di Cuido, na 280-0231 of por manda nos un email tambe. Nos, gustosamente ta informa e persona cu a solicita nos e informacion aki”, Dijkhoff a señala.
Jayburtt Dijkhoff a bisa cu e idea ta data caba di varios aña, cu nan ta bay haci e registro publico, accesible pa publico, y si tur cos bay bon, nan ta calcula cu mas of menos na Juli ta bay anuncia cu e registro ta bira habri.
“Esey kiermen cu na momento cu e wordo anuncia, cualkier persona por bay riba e website di Instituto di Calidad, pa busca dentista, docter, boticario, fisioterapeuta, y wak si e ta registra y kico ta su status tambe y na unda e tin mag di traha”, Dijkhoff a señala.
Jayburtt Dijkhoff tambe a menciona cu e Instituto di Calidad ta traha estrechamente cu IVA (Inspeccion di Salud), cu ta esun cu ta bay riba caya bishita instancianan y controla si nan ta cumpli cu e rekisitonan di ley, y Instituto di Calidad ta monitorea e reglanan, y si mester bin cambionan y adaptacion, nan ta haci esey.
Nan ta hacie conhuntamente cu e feedback cu nan ta haya di IVA, pero tambe nan a lanta e “Kwaliteitsraad”, cu ta e Colegio di Calidad cu ta representa tur e profesionalnan di cuido, y tambe e Organizacion di Pashent, ademas di AZV.
“Anto hunto nos ta delibera riba ki otro reglanan mester awo, pa mehora e situacion y con pa mehora e situacion di e pashent, seguridad di pashent, derechonan di pashent, comunicacion cu pashent. Pues esaki ta un topico cu a bin dilanti, nos tin riba agenda pa bay lanta un Comision Tecnico, pa bay cuminza papia riba kico ta e rekisitonan basico cu dentistanan, oficinanan di tecnico dental, tur esakinan mester cumpli cu ne, anto nos ta verwacht cu den transcurso di e añanan aki nos ta bay trece mas claridad kico nos por spera di e desaroyo aki”, Jayburtt Dijkhoff a declara.
