ORANJESTAD (AAN): Mirando cu calor fuerte lo sigui presenta, AHATA su Comite di Medio Ambiente a prepara material practico pa yuda dunador di trabao y
empleado percura pa proteccion. AHATA a comparti e material educativo cu su miembronan cu e meta ta pa yuda companianan fortifica nan medidanan pa proteha trahadonan contra calor. Alavez e material ta inclui tips pa empleado cuida nan mes y reconoce sintomanan di alerta.
Entro otro ta pidi dunado di trabao pa tene cuenta cu oranan mas calor ora di schedule trabao y pa semper tin awa disponibel y accesibel. Ta importante pa tin lugar cu sombra of fresco unda trahadonan por tuma break cortico of pa alterna nan tareanan. Asina por evita cu nan ta keda demasiado tempo den solo durante e oranan di mas calor.
Trahador tin responsabilidad tambe pa cuida nan mes y esnan rond di nan. Pone atencion riba otro, especialmente mucha y adulto mayor. Calor por afecta cada persona di un manera diferente. Indicador cu calor ta afectando un persona ta inclui: mareo, gana di saca, falta di forsa, cansancio fuera di normal y cram di musculo. Si un persona presenta un of mas di e sintomanan aki, stop e actividad, hib’e den un lugar fresco y no lage su so. Busca ayudo mesora si e sintomanan ta serio of no ta mehora.
AHATA su Comite di Medio Ambiente ta gradici DVG y CMO pa nan sosten valioso den preparacion di e material educativo. Un danki special na Bucuti & Tara Beach Resort, miembro di e comite, pa contribui cu varios consehonan practico pa e iniciativa aki.
AHATA su Comite di Medio Ambiente ta consisti di representantenan di companianan miembro cu ta uni nan conocemento y experiencia pa trata temanan relaciona cu medio ambiente y sostenibilidad. E comite ta intercambia ideanan, identifica necesidadnan y desaroya iniciativanan y materialnan practico cu por wordo comparti cu tur miembronan di AHATA. Asina, e comite ta contribui na practicanan mas sostenibel, bienestar di trahadonan y un industria turistico mas prepara pa futuro.
