Tisa LaSorte, CEO AHATA:
ORANJESTAD (AAN) E siman aki e CEO di AHATA, Tisa LaSorte, den entrevista cu DIARIO a expresa su satisfaccion cu e trabaonan pa drecha e boulevard dilanti di hotelnan 'high-rise' a cuminza, despues di hopi aña cu e caminda ta deteriora, cu ta un mal bista y hasta peligroso pa esnan cu ta cana of cruza caya, eybanda.
AHATA ta contento cu por fin tabata tin e cen den presupuesto pa por cuminza e proyecto. Tin un bon comunicacion entre DOW y AHATA pa prepara ora nan ta cera caminda, unda ta cera caminda, pues nan ta sinti cu e ta bon organiza. AHATA tin speranza cu nan caba e parti aki riba e fecha planea, pa fin di e aña aki, y e ta un proyecto di tres aña. Asina LaSorte a señala.
AHATA ta contento cu DOW a manda nan e detayenan di e plan y di mira cu prome cu nan drecha e caya mes, nan ta bay haci e pipanan di riolering mas grandi y cu e nivel di awa tambe lo bira mas grandi, cu por carga mas awa di awacero pa hib’e pafo di e cayanan.
“Nan ta drechando infrastructura, no solamente riba e superficie di e caya. E prome dos añanan nan ta bay traha riba e caminda mes, e infrastructura manera mi a bisa, e riolering, anto den e di tres aña ta bay haci e parti di embeyecimento. Eynan nos a ofrece di participa den esaki. Nos ta sinti cu nos tur ta pagando impuesto pa drecha caminda caba. Kiermen si e caya dilanti mi cas ta kibra ami no ta bay drecha e caminda. DOW ta responsable pa esey”, Tisa LaSorte a remarca.
“Pero nos a ofrece si, como AHATA si nos por yuda cu algo pa ora nan haci e lugar mas nechi, por ta e matanan, nos por ofrece di paga p’e”, CEO di AHATA a indica, y a agrega cu e tin entendi cu nan ta bay agrega un pida mas di parkeo.
