AHATA Impact Award 2024 a reconoce 4 compania pa nan gran impacto positivo den comunidad

ORANJESTAD (AAN): Diabierna atardi a tuma lugar e di dos edicion di AHATA Impact Award, organiza pa Aruba Hotel & Tourism Association (AHATA).

E programa di premiacion a reconoce varios compania cu a destaca den e ultimo aña pa nan responsabilidad social y inversion den mehoramento di comunidad.

   Un panel di hurado independiente, forma pa 5 profesionalnan, a revisa y analisa 33 aplicacion di companianan cu ta dedica tempo y recursonan na crea un impacto positivo den nos comunidad.

   Pa medio di e criteria oficial selecciona pa e hurado, a nombra un ganador pa cada un di e 4 categorianan di e AHATA Impact Award: “Representacion di Patrimonio Cultural”, “Desaroyo di Bienestar di Empleado”, “Proteccion di Medio Ambiente” y “Inversion Social”. Cada un representando un pilar di sostenibilidad.

   E ganadornan di e AHATA Impact Award 2024 pa nan esfuerso excepcional na bienestar di nos isla ta:

(*) La Cabana Beach Resort pa “Representacion di Patrimonio Cultural”.

(*) Aruba Marriott Complex pa “Desaroyo di Bienestar di Empleado”.

(*) Tropical Bottling Company pa “Proteccion di Medio Ambiente”.

(*) De Palm Corporation pa “Inversion Social”.

  Durante e ceremonia, Presidente y CEO di AHATA, Tisa LaSorte, a entrega un escultura di brons haci na man pa artista Gilbert Senchi na e 4 ganadornan. Adicionalmente, 4 compania cu tambe a demostra gran contribucion na nos comunidad a ricibi un mencion honorabel. E mencionnan honorabel ta: Aruba Marriott Complex pa “Representacion di Patrimonio Cultural”, Divi Resorts pa “Desaroyo di Bienester di Empleado”, Amsterdam Manor Beach Resort pa “Proteccion di Medio Ambiente” y Tropical Bottling Company pa “Inversion Social”.

   AHATA ta orguyoso di e dedicacion inmenso di e ganadornan y ta gradici tur compania cu ta inclui metanan di sostenibilidad den nan plan anual y ta tuma accion pa contribui na un cambio positivo na nos isla. Cu e exito di AHATA Impact Award, e asociacion ta cumpli cu un di nan metanan principal pa apoya comercio sostenibel y ta spera di por inspira mas participacion y dedicacion di e mundo comercial na practicanan y iniciativanan cu gran impacto cultural, laboral, ecologico y social.

  E panel di hurado, cu a dedica nan tempo y conocemento na e programa di premiacion, a consisti di: Daniel Tecklenborg (Director di CEDE), Rosabelle Illes (PhD den Psicologia y Miembro di Facultad di Universidad di Aruba), Jan Noordzij (Director di Advance Human Resource Services), Francielle Lacle (Advisor di Desaroyo Sostenibel), y Edjean Semeleer (Cofundador di Go Cultura Foundation).

  AHATA ta gradici e patrocinadonan di e evento ceremonial aki tambe.