AHATA Excellence Awards 2026 a celebra 37 profesional excepcional

ORANJESTAD (AAN): Un anochi yen di emocion y orguyo a marca e AHATA Excellence Awards 2026,

unda Aruba Hotel & Tourism Association (AHATA) a honra 37 profesional excepcional. E celebracion a reuni 250 invitado den e Astor Ballroom di The St. Regis Aruba Resort pa celebra e personanan cu a contribui na exito di nos pais cu nan pasion y servicio.

E premiacion anual ta un expresion di gratitud di industria na esnan cu ta duna lo miho di nan mes, dia aden y dia afo. Selecta pa nan respectivo compania, tur persona cu a ricibi homenahe ta destaca pa nan dedicacion excepcional durante aña. Den un variedad di funcion, nan ta yuda crea un economia productivo y ta fortifica e imagen di Aruba.

E ceremonia a pone e persona central, celebrando nan logro y e orguyo cu nan ta trece na nan mes y na nan famia y coleganan. Durante e ceremonia, 37 persona a ricibi un trofeo artistico diseña specialmente pa artista local Gilbert Senchi. Den forma di un cocolishi, e trofeo ta representa e calor y durabilidad di nos hospitalidad. Presidente y CEO di AHATA, Sra. Tisa LaSorte, a presenta e premionan riba scenario, dilanti representantenan di industria y ser keri di cada persona honra.

Den e proximo simannan, AHATA lo comparti storia di cada honorado riba media social pa e comunidad por conoce e motivacion y pasion tras di nan trabao. Sigui e homenahenan na facebook.com/arubahotelandtourismassociation y riba Instagram na @arubahata.

AHATA ta orguyoso di e evento especial y e profesionalnan di nos industria turistico. AHATA ta gradici tur sponsor y partner pa nan apoyo esencial: Elite Productions & Entertainment The St. Regis Aruba Resort, De Palm Corporation, Tropical Bottling y Wings Global Media. AHATA ta gradici tambe e studiantenan voluntario di EPI Hospitality y demas voluntario: Juf. Zahaira Kelly, Ricardo Kock y Danique Erasmus.