AHATA Excellence Awards 2022 a honra 40 empleado sobresaliente pa nan dedicacion

ORANJESTAD (AAN): Durante un evento elegante atendi pa 190 persona, Aruba Hotel & Tourism Association a celebra den grandi e empleadonan altamente motiva cu ta e esencia di nos exito den turismo.

            Durante e anochi mahestuoso nan a ricibi nan certificado y un regalo monetario di Presidente y CEO di AHATA, Tisa LaSorte. Minister di Turismo y Salubridad Publico, Mr. Dangui Oduber, Hunta di AHATA, companianan miembro y familiar nan tabata presente na Hyatt Regency Aruba diasabra anochi pa gradici y felicita e honradonan.

            Esaki ta e di cinco aña consecutivo cu AHATA ta yuda su miembronan honra empleadonan ehemplar. E siman benidero lo presenta cada honrado un pa un riba rednan social.