Presidente di FTA, Hose Figaroa:
*Cantidad di turismo ta aumenta pero ocupacion camber hotel ta bahando!
ORANJESTAD (AAN) – Presidente di FTA, mr.Hose Figaroa a splica den entrevista cu Matutino DIARIO, cu e demanda di vacation rentals ta come for di e cifranan di cambernan di hotel, y mientras cu Gobierno no a reacciona riba e advertencia di AHATA, hotelnan si ta keda preocupa cu e desaroyo aki, y nan si ta carga e pilar economico di nos Isla, cu ta turismo.
“Mi ta kere cu simplemente riba e hecho cu AHATA a menciona esaki, e bell a cuminza sona caba. Ta importante pa, no solamente, bati e bell pero pa haya oido di gobierno riba e bell aki. No laga nos warda pa e baca hoga, pa e ora ey nos bay mira con nos ta regla e asunto aki. Ban actua for di awo, unda berdad nos ta mira cu tin señalnan riba e hecho, entre otro, di falta di regulacion ta haciendo un efecto riba bo economia”, Figaroa a señala.
El a reitera cu no mester lubida cu e mercado laboral ta depende hopi di e sector hotelero. “Un vacation rental hopi biaha no tin e cantidad di trahado. Bo tin un ploeg, loke ta sosode diferente bez, por ehemplo housekeeping cu ta pasa solamente ora di haci limpieza, mientras cu den un hotel bo tin un grupo grandi di hende cu tur dia ta den housekeeping, den camber, food & beverage, etc. Mi ta papiando di 500 of mas trahado cu ta depende di e sector aki”, Hose Figaroa a subraya.
El a señala cu e sector di hotel ta hopi mas intensivo cu esun di vacation rentals; pues, ta importante pa nos aprob’e pero mientras por regul’e pa tin un balansa entre e dos ofertanan aki ta duna, pa no bin haya cu tin un oferta demasiado grandi vacation rentals cu ta bay den desventaha di e hotelnan, locual aworaki tin indicacion cu e cifranan den cantidad di turista ta subi pero esun di hotel ta baha.
“Kiermen, e turista ta kedando otro caminda cu no ta na hotel. Ta importante pa takel esaki mesora, pasobra e ta tardando”, segun Presidente di FTA, Hose Figaroa.
