SANTIAGO: Centenares di persona a acudi e siman aki dilanti Palacio di Husticia na Santiago,
pa denuncia un estafa grandi cu a wordo cometi pa e agencia di viahe cu yama ‘Lun Travel’, cu a priminti di bende nan un package di viahe pa famia na varios pais na Europa.
Nan keho ta dirigi riba e muher Katherine Ceneida Villa Cruz, kende ta registra como doño di e agencia di viahe, kende a bende e pakete di viahe aki na mas di 500 persona cu ta biba na diferente parti di Republica Dominicana.
Un di e victimanan, Rosirys Muñoz a keha cu e ta un di esnan afecta, y hunto cu cuatro persona mas di municipio di Cotuí di provincia Sánchez Ramírez, a paga 3.600 Dollar pa bay cu e viahe familiar aki pa Europa.
Segun e denunciantenan di e estafa, nan a haci tur esfuerzo pa asina e agencia di viahe Lun Travel y su doño Katherine Villa Cruz duna cara, pero a bin nota cu ta imposible pa nan haya nan placa bek. A sali na cla cu e agencia a duna como 50% di e placa bek na algun cliente.
Esnan cu a soña di viaha pa Spaña, Francia, y Italia a keda mal pega, pasobra djis dos dia prome cu sali pa Aeropuerto, nan a bin haya sa cu e viahe a cancela. Pesey mes a dicidi na hinca e caso aki den man di husticia.
Un grupo di 70 pasahero afecta, a busca un abogado pa representa nan. Di e pasaheronan ey so, e suma cu nan a paga a pasa 170.000 Dollar. A bin sali na cla cu e muher ta promove e Tournan via social media, unda nan ta dunabo number di cuenta di banco y contacto di telefon. Pero ora cu e fecha di viahe tabata yegando, e doñonan Dominicano ta desaparece.
