ORANJESTAD (AAN): Aruba Fair Trade Authority (AFTA) ta promove competencia husto y efectivo na Aruba y ta supervisa e cumplimento cu e reglanan relaciona cu competencia.
AFTA ta un autoridad independiente cu a cuminsa na principio di e aña aki.
E independencia di AFTA y su fuccionamento ta regla den ley. Ariba 4 di december, e Minister di Asunto Economico, Comunicacion y Desaroyo Sostenibel y e presidente di e directiva di AFTA a firma un Protocol di Interrelacion. Den e document aki independencia di AFTA ta keda ancra, por medio di acuerdonan tocante asuntonan financiero, responsabilisacion, funcionamento y consulta.
Den 2024, AFTA a enfoca riba agentenan di real estate, supermercadonan y actividanan di Informacion y concientisacion. Como resultado di e conversacionnan cu AFTA tabatin cu e Asociacion di Realtors di Aruba, ARR, a retira su Commission Guidelines. E cambio aki ta representa un mehoracion den competencia entre agentenan di real estate. Awo, tur persona na Aruba cu cumpra un cas via di agentenan di real estate brokers no por wordo forsa pa accepta tarifanan cu a wordo acorda entre real estate brokers, pero por negocia un tarifa libremente y por busca otro agente cu un tarifa mas conviniente.
Na september, AFTA a publica un investigacion di mercado tocante e prijsnan y structura di e mercado den e sector di alimentacion. E investigacion aki di AFTA a conduci na varios conclusionnan cu a wordo resumi den e investigacion aki, cu a ser publica. Debi na algun observacionnan preocupante cu a ser identifica, AFTA a dicidi di inicia dos investigacion adicional: un tocante acuerdonan di distribucion exclusivo y un otro tocante e transporte maritimo di containers pa Aruba.
Na november, AFTA a presenta un rapport di recomendacion riba peticion di Minister di Asuntonan Economico, cu recomnedacionnan referente distribucion di e spectrum di frecuencia pa telefon celular. E recomendacionnan den e rapport ta orienta riba stimulacion di competencia den e mercado di telefon celular.
Durante aña 2024, AFTA a organisa varios reunion pa informa e comunidad y empresanan tocante e reglanan nobo di competencia. Practicamente tur asociacionnan empresarial a wordo invita pa participa na un of mas presentacion hunto cu nan miembrecia, cu atencion specifico ariba nan sector (16 reunion). Tambe AFTA a topa cu varios (24) empresanan individual.
AFTA ta sigui dedica na engrandece competencia na Aruba, percurando asina cu empresanan no abusa di nan posicion di poder, cual ta obliga empresarionan pa haci nan maximo esfuerso pa satisface e necesidadnan di consumidornan. Esaki ta stimula prijsnan mas abou, mas opcion, mihor calidad, y innovacion di productonan y servicio pa e consumidor.
Negoshinan ta beneficia di un nivel di competencia igual, un mihor clima di inversion y mihor oportunidadnan pa negoshinan nobo pa subi mercado sin bareranan innecesario. E obhetivo final di tur esaki ta crecemento economico pa Aruba y mas prosperidad pa consumidor.
Si bo tin informacion tocante un violacion di reglanan di competencia, tuma contacto cu e AFTA, nan ta respeta bo privacidad.
