Roly Sint Jago, Presidente di AFTA a enfatiza:
*Nada di haber cu cartel criminal!
ORANJESTAD (AAN)—Presidente di Directiva di Aruba Fair Trade Authority, señor Roly Sint Jago, den conferencia di prensa a haci e aclaracion y a enfatiza, riba e palabra “cartel” cu AFTA ta pone riba propaganda, y cu a conduci na un pregunta causa pa confusion, di un miembro di prensa.
Señor Sint Jago a duna e siguiente relato aclaratorio:
“E palabra cartel tin varios nificacion. Tin cartel criminal y cartel di prijs. Na momento cu nos ta papia di cartel, nos ta papia di companianan cu hunto a cera cabes pa determina cierto prijs, of pa elimina cierto miembronan di comercio cu ta compitiendo cu nan. E no ta cartel den sentido di cartel criminal manera nos tin rond di nos. E palabra cartel cu nos ta uza ta pa cooperacion comercial ilegal a base di e Ley di Ordenanza”, señor Sint Jago a señala.
Señor Sint Jago a remarca cu e mercado tin cu custumbra cu e uso cu AFTA ta duna e palabra cartel. “No e uso internacional di connotacion negativo. Nos ta papiando di cartelnan comercial riba mercado aki na Aruba”, el a subraya, y a agrega: “Nos ta dune un contenido local den cuadro di e Ley di Ordenanza di Competencia”.
