ORANJESTAD (AAN): Diahuebs mainta Minister di Finansa, Asunto Economico y Sector Primario, mr. Geoffrey Wever a
reuni cu directiva di Aruba Fair Trade Authority (AFTA) pa ricibi jaarverslag 2024, incluyendo e jaarrekening 2024 di AFTA, acompaña pa un goedgekeurde controle verklaring di un accountant independiente.
AFTA a wordo institui door di Minister Wever riba 1 di januari 2024 cu e meta pa promove competencia husto entre empresanan. E ley di competencia husto (mededingsverordening) a drenta na vigor 1 di januari 2024. Tur esaki pa crea un mercado husto pa tur hende. AFTA ta un entidad cu ta opera independiente di gobierno di Aruba, cu tin su mesun autoridad y tools pa actua.
E directiva di AFTA ta consisti di Sr. Roly Sint Jago como presidente, Sr. M. Snoep y Sr. M.Visser como miembro. Sr. Snoep ta tambe presidente di e autoridad di competencia husto na Hulanda cu ta ACM.
Derecho y proteccion di e consumidor y un mercado husto y eficiente pa tur consumidor ta un prioridad pa Minister Geoffrey Wever y pa e motibo ey recientemente Minister Wever a prepara hunto cu AFTA e ley di proteccion di consumidor, esta e Landsverordening Handhaving Consumentenbescherming cu dentro di algun siman lo wordo trata den Parlamento di Aruba, pa asina duna AFTA e autoridad pa proteha e consumidor contra practicanan inhusto.
“Mi ta sumamente contento con AFTA a progresa pa asina crea un mercado husto pa nos comunidad y pa tur ciudadano. Practicamente tur pais moderno tin un autoridad di competencia husto y nos por ta orguyoso cu Aruba tambe tin uno.”, segun Minister Geoffrey Wever.
