Cu apertura di diferente hotel y negoshi na Aruba
ORANJESTAD (AAN): Aruba Food and Beverage Association (AFBA), ta organizando e di 3 version di su Job Fair, cu lo tuma luga dia 12 di Juni proximo na Aruba Renaissance Convention Center.
E Job Fair aki ta organiza pa duna e miembronan di AFBA un espacio pa esnan interesa promove y ofrece puestonan di trabao den nan organizacion. E ta un Feria di un solo dia, unda studiante, personanan cu ta interesa pa un trabao fiho of di trabao adicional por aplica y haya un puesto laboral e mes un dia.
E dia aki AFBA lo trata di haci actividadnan atractivo y lo tin premionan cada hora pa esnan presente.
AFBA Job Fair na 2023 a atrae mas di 2000 persona y por a ofrece mas di 500 puesto di trabao, algun por a ser cubri durante e feria. Pa e aña aki ta spera di surpasa e cantidad aki.
Manera cu ta bin ta vocifera pa basta tempo den e indutria di alimento y bebida tin cupo di trabao disponibel dificil di cubri. Aunke AFBA como organizacion ta habri pa haya ademas trahado temporal of 'half time', no ta logra yena e cuponan existente.
Ta sigui reuni cu instancianan educativo na Aruba pa atrae studiante of graduando pa asina por logra ofrece un trabao pa esnan interesa. E prioridad principal ta pa brinda oportunidadnan di trabao na ciudadanonan di Aruba, ya cu e proceso di aplicacion pa permiso por ta compleho y tuma hopi tempo. Apesar di esaki, ta colaborando activamente cu agencianan gubernamental pa identifica manera di simplifica e proceso y hacie mas atractivo pa buscadornan di trabao stranhero y asina cubri e puestonan di trabao existente.
Top of Form
Bottom of Form
Cu apertura di diferente hotel y negoshi na Aruba, AFBA ta premira cu lo mester mas di 3,000 puesto di trabao den e proximo añanan.
Ta spera cu pa e AFBA Job Fair aki lo logra yuda e miembronan y establecimientonan participando haya nan meta di por contrata persona interesa pa traha den Horeca.
Ta invita tur studiante, buscador di trabao, of cualkier persona interesa pa obtene informacion pa bishita Aruba Renaissance Convention Center dia 12 di Juni for di 9 am pa studiante y pa 10 am te 7 pm poblacion en general.
