Aeropuerto di Curaçao a lansa su mes awor cu un nomber nobo

CUR Curaçao International Airport

WILLEMSTAD: E operador di aeropuerto di e isla ruman, esta Curaçao Airport Partners (CAP) a devela den fin di siman e logo y branding nobo pa nan Aeropuerto.  Nan a indica cu e cambio di nomber aki ta refleha nan compromiso pa asumi e rol di establece CUR | Curaçao International Airport como un global gateway, preparando escenario pa mehora e strategianan di mercadeo y posicionamento internacional destacando e isla den tur e mercado di aviacion internacional awendia.

   E logo nobo di e Aeropuerto ta focus riba e IATA-code di “CUR” poni prominente y bao di dje e nomber completo di “Curaçao International Airport”.  E identidad moderno awor ta poni riba fachada di e aeropuerto, simbolisando un cambio pa cu un marca mas vibrante y dinamico cu ta destaca internacionalmente, un etapa significante den e plan di cinco-aña cu CAP tin den mente.

   E develo di e logo nobo riba edificio a wordo haci pa nan CEO, esta Jonny Andersen hunto cu Ministro di Desaroyo Economico, Ruisandro Cijntje, cu Airport Supervision Manager Giordano Molina, y Muryad de Bruin kende ta director di Curaçao Tourist Board.  Tabata presente tambe Prome Ministro Gilmar Pisas, Ministro di Transporte Charles Cooper, Ministro di Desaroyo Social Ruthmilda Larmonie-Cecilia, Ministro di Ciencia y Cultura Sithree van Heydoorn, Ministro di Husticia Shalton Hato, Ministro di Planning y Servicio Ornelio Martina.