KRALENDIJK: Siman pasa, Flamingo Airport a yega na un logro historico: Pa prome biaha den su historia, e aeropuerto a ricibi 500.000 pasahero den un solo aña calendario.
E honor a cay pa sra. Liselot di Hulanda, kende a yega Bonaire pa vakantie.
E pasahero a baha riba un vuelo di KLM y e dama a bin haya sa cu el a bira pasahero #500.000. El a ricibi un bon bini festivo riba e plataforma. E celebracion a sigui despues cu empleado- y invitadonan den e terminal. Un pakete di regalo specialmente prepara a keda presenta na nomber di diferente instancia y compania. Mas trempan den dia, a conmemora e ocasion special aki cu entrega di bolo na tur empleado di Aeropuerto.
“Yega na e meta aki di mey miyon pasahero ta un logro maraviyoso,” ta loke Giordano Molina a bisa, kende ta Director Operacional di BIA cu ta maneha e Aeropuerto. “E ta refleha e desaroyo positivo di Flamingo Airport den e ultimo añanan. Danki na partnershipnan fuerte cu companianan di aviacion y partnernan den sector turistico, y e confiansa cu biaheronan tin den Bonaire como destinacion, nos ta sigui logra crecemento sano.”
Cu e logro historico aki, BIA ta mira pa futuro cu confianza, cu atencion continuo pa calidad, crecemento sostenibel, y e caracter unico di Flamingo Airport y e isla.
