Entrante november 2026
ORANJESTAD (AAN): Aruba Airport Authority N.V. (AAA) ta preparando pa introduci un sistema nobo di maneho di parkeer pa e area di parkeer publico di aeropuerto na november 2026, implementa pa provee un experiencia di parkeer mas conveniente y eficiente pa e bishitantenan.
Mientras cu Aeropuerto di Aruba ta prepara pa introduci su sistema nobo di maneho di parkeer na november 2026, tur cliente cu tin un vehiculo staciona actualmente den e area di parkeer publico pa un periodo extendi mester saca nan vehiculo for di e luga di parkeer pa 31 di october 2026. E ticketnan di parkeer existente lo no ta valido mas bou di e sistema nobo, loke ta hacie importante pa kita e vehiculonan prome cu e transicion of pa evita cualkier incomodidad of retraso.
Un experiencia di parkeer mas inteligente
E sistema nobo di parkeer lo introduci tecnologia di reconocemento di plachi di number, loke ta permiti pa registra un plachi di number automaticamente na momento cu drenta e area di parkeer publico. Mientras cu e sistema nobo lo sigui emiti ticketnan pa parkeo publico como backup, e bishitantenan tambe lo por haci pago haciendo uzo di e number di nan vehiculo, hasta si nan perde nan ticket fisico. Ta e intencion pa e sistema nobo mehora e experiencia general di parkeo na Aeropuerto di Aruba, incluyendo entrada y salida mas lihe, opcion adicional di pago, reduci aglomeracion y mehora e disponibilidad di espacio pa parkeer.
Bou di e sistema nobo, e tarifa di parkeer publico lo keda 3.00 florin pa ora, e sistema ta tene cuenta e cantidad di tempo cu un vehiculo a keda staciona a base di e plachi di number registra na momento di drenta e area di parkeer publico. E bishitantenan lo tin varios manera conveniente pa paga pa parkeer, incluyendo online via Pay.aw y na e stacion di pago asigna situa paden di e sala di yegada, na e Food Truck Plaza y na salida. Por haci pago uzando carchi debit of credit. Tene na cuenta cu no ta acepta American Express.
Parkeo publico destina pa uzo di tempo cortico
Aeropuerto di Aruba ta recorda e bishitantenan cu e area di parkeer publico ta destina primordialmente pa e bishitanan di corto plaso na aeropuerto, incluyendo esnan cu ta baha y busca pasahero, bishita na aeropuerto y topa & saluda e pasaheronan cu ta yega of ta bayendo.
Ta curasha e bishitantenan cu mester di parkeer extendi pa explora e opcionnan di subscripcion di parkeer disponibel a traves di e portal di Aeropuerto di Aruba prome cu biaha: https://l1nq.com/0urxt1u
Kico e bishitantenan mester haci awo
E bishitantenan cu actualmente tin un vehiculo staciona den e area di parkeer publico di Aeropuerto di Aruba pa un periodo extendi mester garantisa cu nan ta saca nan vehiculo for di e luga di parkeer no mas tarda cu dia 31 di october 2026, prome cu e transicion pa e sistema nobo na november 2026.
Den e proximo simannan, Aeropuerto di Aruba lo sigui comparti informacion importante tocante e sistema di parkeer nobo a traves di su rednan social y website, incluyendo un serie di videonan informativo cu ta splica con e sistema ta funciona, unda y con pa paga y kico e bishitantenan por spera na momento di drenta y sali for di e area di parkeer publico.
Ta curasha tur bishitante pa mantene nan mes informa a traves di e rednan social oficial di medionan social y website di Aeropuerto di Aruba prome cu e lansamento di november.
