Aeropuerto di Aruba a yama bonbini na delegacion di DCA y na Autoridad di Aviacion Civil di Hulanda

ORANJESTAD (AAN): Aruba Airport a yama bonbini na delegacion di Departamento di Aviacion Civil Aruba (DCA) y

Civil Aviation Authority of the Netherlands (CAA NL) pa un bishita oficial na Aeropuerto Internacional Reina Beatrix. E bishita a brinda un oportunidad pa demostra e inversionnan continuo di infrastructura di Aeropuerto di Aruba, mehoracionnan operacional y plannan di desaroyo den futuro bou di e programa di expansion Gateway 2030.

E delegacion a consisti di e representantenan di Departamento di Aviacion Civil Aruba y Autoridad di Aviacion Civil di Hulanda.

Durante e bishita, e delegacion a haci un recorido na e U.S. Check In Hall nobo di aeropuerto, cu a habri na april 2025 como parti di e Fase 1A di Gateway 2030. E facilidad ta mehora e experiencia di e pasahero significantemente a traves di mehoracion di capacidad di check-in, areanan modernisa di procesamento y un miho eficiencia operacional.

Ademas e delegacion a bishita e area di sistema di maneho di maleta (BHS) di Aeropuerto di Aruba, cu ta diseña pa procesa te cu 2.000 maleta pa ora y ta conta cu tecnologia di screening avansa pa mehora procesamento di maleta, siguridad y eficiencia operacional en general.

Como parti di e bishita, AAA a brinda e delegacion cu un actualisacion di Gateway 2030 Fase 1B, sigui pa un tour guia door di e area di construccion cu ta activo actualmente. E delegacion tabatin e oportunidad di mira e progreso cu tin riba e proyecto di expansion, cu lo introduci tres brug di embarcacion nobo, tres gate nobo pa bus, mas capacidad den e sala di espera y opcionnan adicional comercial como tambe di cuminda y bebida diseña pa mehora e experiencia di pasahero y sostene crecemento di Aeropuerto di Aruba den futuro.

E programa a conclui cu un tour den area di airside, ofreciendo e delegacion un bista riba e operacionnan di aeropuerto, infrastructura di aeropuerto y e desaroyonan continuo cu ta sostene e vision a largo plaso di Aeropuerto di Aruba pa provee un experiencia di biahe cu ta sigur, eficiente y di clase mundial.

“Nos ta contento di por a yama e representantenan di DCA Aruba y di Autoridad di Aviacion Civil di Hulanda bonbini na Aeropuerto di Aruba”, asina Jonny Andersen, CEO di Aruba Airport Authority N.V. a duna di conoce. El a continua bisando cu:

“Bishita manera esun di awe ta brinda un oportunidad excelente pa intercambia conocemento y demostra e inversionnan significativo cu nos ta haciendo pa prepara Aeropuerto di Aruba pa futuro. Pa medio di Gateway 2030, nos ta desaroyando infrastructura moderno y engrandeciendo e experiencia di e pasaheronan pa sostene e crecemento continuo di nos aeropuerto y e conectividad di Aruba cu mundo. Como un di e aeropuertonan mas druk den Caribe, nos ta keda comprometi pa construi un aeropuerto cu ta refleha e ambicionnan di nos isla y ta sirbi nos comunidad, bishitantenan y partnernan di e aerolinea pa añanan largo.”

E bishita a destaca e colaboracion fuerte entre e autoridadnan di aviacion na Aruba y Reino Hulandes, como tambe e compromiso comparti pa mantene e standardnan di mas halto di siguridad, proteccion y excelencia operacional y servicio na pasahero den henter e sector di aviacion.