ORANJESTAD (AAN): Tin un aerolinea nobo cu masha hopi avion grandi cu a caba di sali di fabrica,
cu ta bay cuminza haci vuelo for di Republica Dominicana pa diferente pais den region. Y nan a divulga e siman aki cu nan lo ta bay bende pasashi na 55 Dollar Mericano pa un trayecto, y di 149 Dollar di ida y vuelta, cu tur tax inclui.
E informe aki a bira topico di combersacion na e pais, y a pone hopi otro aerolinea spanta un tiki pa cu e anuncio aki.
Ta trata aki di Arajet, cual compania tin ya diferente Boeing 737-Max 800 nobo den nan poder, y ta wardando mas pa yega di fabrica.
E aerolinea a bisa cu den nan plan, nan kier bula pa varios punto den Norte America, Centro America, Sur America, y Caribe. Nan meta ta pa haci Republica Dominicana bir aun ‘hub’ pa pasaheronan.
Victor Pacheco kende ta president di Arajet a bisa cu e aerolinea lo marca e renacemento di Aviacion Dominicano y nan pronostico ta cu den alrededor di 5 aña nan lo ta transportando 7 miyon pasahero pa aña.
“Nos a priminti prijs abao, y nos ta bay tin mas tarifa nunca antes bisto na nos pais, y entrante September nos lo cuminza converti Aeropuerto Internacional Las Americas den e Hub Aereo nobo di Caribe, cu lo permiti pasaheronan conecta na e continente cu menos costo, servicio di clase mundial, y cu avionnan nobo y mas eficiente di mercado.
E prome vuelo lo ta dia 15 di September pa Mexico City, y cu e destino ey lo uni tambe Monterrey y Cancun. Tambe riba e mesun fecha lo cuminza bula pa Barranquilla, Cali, y Cartagena na Colombia, tambe pa Quito y Guayaquil na Ecuador, Lima na Peru, Guatemala City na Guatemala, San Salvador na El Salvador, St. Maarten, Aruba, y Curaçao den Caribe.
E aerolinea nobo a bisa cu nan ta comprometi cu Ministerio di Turismo pa diversifica turismo y e ampliacion di e espacio aereo na tarifanan husto. Y si bo mira e mapa con un aerolinea Dominicano lo conecta Santo Domingo cu asina hopi destinacion, ta mustra confianza den futuro.
Nan lo cuminza cu mas di 5.500 asiento cu prijs di 55 Dollar te cu 100 Dollar pa trayecto, y 149 Dollar pa ida y vuelta cu tur tax inclui. Te ainda no a divulga nada oficial na Aruba di e vuelonan aki.
Arajet a bisa cu nan lo agrega despues vuelo pa Toronto y Montreal na Canada, vuelo pa Medellin y Bogota na Colombia, vuelo pa San Jose na Costa Rica, vuelo pa Kingston na Jamaica. Ya nan tin 5 avion Boeing 737-Max 800, y tin mas riba pedido.
