Thaina Colina Coordinador Fundacion Telefon pa Adultonan Mayor “125”
ORANJESTAD (AAN) -- Matutino Diario a entrevista señoraThaina Colina, Coordinador di e liña 125, cu ta e Fundacion cu ta duna atencion teloefonco na adulto mayor.
A puntra señora Colina con ta bayendo cu e servicio aki, y el a bisa cu e ta bayendo bon, y actualmente nan ta purbando di haci mas presentacion y nan ta dunando orientacion pa informa ken nan ta y kico nan ta haciendo aworaki.
E cantidad di yamadanan di adulto mayor a baha pero toch e boluntarionan ta satisfecho cu locual nan ta ricibi. Esaki pasobra e hendenan no ta mira e necesidad di combersa; nan ta mira mas e necesidad di haci pregunta. Si no tin pregunta nan no ta yama.
“Nos ta ricibiendo aworaki mas yamada di actividadnan, e personanan ta puntra kico tin rond di Aruba, kico tur nan por haci pa sali pafo di cas, y en comparacion cu ora nos a cuminza, tin mas combersacion ameno”, Thaina a indica.
Tin hende ta bisa cu 125 no ta pa nan pasobra esey ta pa hende grandi y nan no ta asina grandi pa nan yama.
“Pero eigenlijk 125 no ta pa bo combersa of pa hende grandi manera bo ta bisa, si abo no mester informacion podise bo mayor si mester of un hende cu bo conoce por tin mester di dje, of beneficia di e liña di telefon y nan por yama pa ricibi informacion of pa combersa si nan ta so na cas of nan ta sinti nan so na e momento ey”, Thaina a señala.
El a bisa cu 67 aña (of 60 plus) ta e edad cu mas frecuente e hendenan ta yama.
“Ultimamente tin hende ta yama pa sa tocante casnan di cuido, of precisamente pa sa si casnan di cuido tin actividadnan social pa nan hendenan grandi, pa tene nan activo. Apart di actividadnan social nan ta yama puntra tocante cuido medico, transporte, y gewoon pa nan grandinan por ta mas independiente”, señora Colina a indica.
El a agrega cu 125 tin un map social pa 60 plus cu informacion di tur e actividadnan cu tin na Aruba, y tambe riba preguntanan cu 125 ta haya cu frecuencia. Thaina a comenta cu e reto di mas grandi cu nos adultonan mayor tin ta transporte, cu ta hopi limita y no economico, teniendo cuenta cu e placa cu nos adultonan mayor ta ricibi ta limita.
