Thaina Colina, Coordinador Fundacion Telefon pa Adulto Mayor:
- Servicio di 125 ta cera 19 December y habri bek dia 5 Januari
ORANJESTAD (AAN)-- Señora Thaina Colina, Coordinador di Fundacion Telefon Adulto Mayor, “125” a sigui splica den entrevista cu Matutino DIARIO, cu actividadnan social pa adulto mayor ta basta limita, pero el a reitera cu e reto mas grandi cu nan tin ta transporte.
Esey ta loke mas e boluntarionan di 125 ta experiencia den e yamadanan di adultonan mayor.
Pa loke ta transporte e fundacion ta bezig ta comunicando cu otro instancianan puntra nan si nan ta organizando actividadnan social pa hende grandi, y si nan ta ofrece transporte pa mas adulto mayor por participa.
Thaina a menciona cu Fundacion Telefon pa Adulto Mayor -125, ta parti di Centro Kibrahacha y e servicio ta cera dia 19 di December, y ta habri bek dia 5 di Januari. Su mensahe pa hende grandi ta pa nan tambe tuma iniciativa di sali foi cas, tuma contacto cu otro hendenan, y pa nan famianan pa percura cu nan adultonan mayor tambe tin telefon, tin carchi, tin internet pa nan tambe por tin contacto ora nan pafo di cas, y pa famia tambe ta den contacto cu nan adultonan mayor si nan mes no por ta presente cu nan na cas.
“Famianan, yama boso grandinan, e ta tuma un rato, bishita nan un rato. E cosnan chikito ey ta pa duna nan atencion, pa nan sinti miho e momentonan ey”, Thaina a subraya.
E hecho cu e cantidad di pensionadonan cu tin aworaki cu ta casi 28 mil, ta trece cu ne cu mester traha riba dje, por ehemplo door di amplia e facilidad di transporte, organiza mas actividadnan social pa adulto mayor, traha mas grupo, esnan cu ainda no ta sinti cu nan ta hende grandi, pues cu ta mas jong., por wordo stimula pa nan ta activo di otro manera, por ehemplo haciendo trabao boluntario, Thaina Colina a señala.
