Ruzischka Tromp di SKOA encuanto actividad na October
ORANJESTAD (AAN): Diaranson atardi durante un conferencia di prensa convoca na sede di Fundacion SKOA, tanto Clarisse Lopez y tambe Ruzischka Tromp di e fundacion, a duna detaye di dos topico importante, cu ta e ‘Nationaal Onderwijs Congress’ y tambe e ‘Eduweek 2026’. Dos evento hopi importante pa staf y personal di SKOA relaciona cu desaroyo y inovacion den enseñanza.
Ruzischka Tromp kende ta staffunctionaris onderwijs, a bisa cu esaki lo bay ta e edicion #9 di SKOA su ‘Nationaal Onderwijs Congres’. E congreso mes ta poni pa socede riba Dialuna dia 5 di October di 7:30 am te cu 3:30 pm.
Segun Tromp, esaki ta un dia dedica na desaroyo professional pa tur docente di SKOA, un dia caminda mas cu 600 docente y personal di SKOA ta topa otro den un setting diferente. E aña aki y pa e añanan venidero nan tema lo ta: ‘Educacion sostenibel cu hemanan manera: AI den enseñansa, sociaal-emotional, leadership den educacion, arte’ y mucho mas.
El a agrega cu nan tin un line-up di orador di Aruba mes, ya cu SKOA ta kere firmemente den expertonan local pero tambe tin expertonan internacional.
Pa prome biaha nos tin un Orador Principal (‘Keynote Speaker’) di New Zealand, biba na Washington. Tambe un TEDx Speaker y conoci como e cabesante cu ta skate cu su skateboard na scol.
Tromp a agrega, cu debi cu e fecha di 5 di October ta dia internacional di maestro, nan lo tin yen di premio pa docentenan, djis pa haci nan curioso, por ehempel nan lo tin mas cu 1 weekend stay como premio! Esaki danki na diferente patrocinador cu ta kere den e maestronan.
Despues lo sigui tanto Diamars, Diaranson y Diahuebs 6, 7, y 8 di October cu SKOA su EduWeek cu ta un evento caminda SKOA ta duna bek na e comunidad di enseñansa di full Aruba. Es decir cu pa Eduweek full e comunidad di enseñansa na Aruba ta invita pa participa na Eduweek, docente, cabesante, IB’ers, SMW’ers, personal di limpieza, personal administrativo, tur ta invita pa join nos EduWeek 2026. Bo ta cordialmente invita pa join nan Eduweek.
Eduweek ta un siman yena cu workshops cu ta trata trendnan den enseñansa pero tambe topiconan mas pa traha riba e desaroyo personal di cada docente.
Nan a escoge e localidadnan strategicamente pa asina e evento di EduWeek ta mas accessible possible pa comunidad di enseñansa.
Diamars 6 di October ta na San Nicolas, Filomena College Mavo y Colegio Santa Filomena.
Diaranson 7 di October ta na Santa Cruz, Colegio San Antonio.
Diahuebs 8 di October ta na Oranjestad, Maria College Mavo.
Pa por join EduWeek mester registra di antemano, via nan website: www.skoa.aw, y click riba
e boton di EduWeek, yena e formulario y bo ta cla pa join EduWeek.
Como muestra di gratitud na comunidad di enseñansa, nan lo tin un premio pa esnan cu ta participa na EduWeek. Mas workshop nan atende, mas grandi e chens ta cu nan por gana un Apple iPad completamente nobo.
Manera ta conoci, nan congreso tur aña ta pa maestronan di SKOA so. Pa celebra cu e comunidad completo di enseñansa, nan ta lansa oficialmente un campaña riba Facebook Campaign. Nan kier regala un maestro dos ticket pa asina presencia e congreso. Pues no ta importa e nivel di enseñansa! Es decir si bo ta traha na kleuter, basis Mavo of EPI, bo ta bon bini pa participa. Riba e pagina di SKOA, djis like y share e campaña, y uza e hashtag SKOACongres2026. Deadline ta 15 di September, y ya riba 16 di September lo saca ganador.
SKOA ta gradici nan patrocinadornan, como tambe e comision organisado di SKOA y no por lubida e docentenan cu ta participa activamente na Het Nationaal Onderwijs Congres y SKOA EduWeek. Sin nan, e eventonan no lo por ta posibel.
