Addonsito ta felicita Sandra Garcia cu e expo na Camara di Comercio 

ORANJESTAD (AAN): Fin di siman, e artista local Sandra Garcia a lansa su expo nobo na Camara di Comercio (KvK) Aruba.

E expo tin como titulo “Between Veil and Enigma”.

            E expo aki ta e resultado di Sandra su talento cu ta bini for di su alma universal. E anochi tawata bon bishita pa otro artista- y personahenan cu tin un rol importante den nos comunidad. Artista musical invita tawata Anouk Balentin kende cu su talento riba blokfluit a deleita tur presente.

            KvK tin e tradicion bunita aki di brinda nan espacio na talentonan local pa asina nan comparti cu publico nan arte. E trato ricibi di parti di KvK Aruba tawata unico y tur presente a disfruta di e ambiente dushi.

            Henter Aruba ta keda invita pa presencia e mas cu 20 obra cu pa mas cu 1 aña y 3 luna lo ta na KvK Aruba.