Acuerdo NPRfit ta habri caminda pa trahado den gobierno cu contracto laboral acumula pensioen

Prome Minister Mike Eman:

ORANJESTAD (AAN): Prome Minister Mike Eman, hunto cu Minister di Finansa, Asuntonan Economico y Sector Primario, Geoffrey Wever, y Minister di Husticia, Integracion y Transporte Publico, Arthur Dowers, a firma un acuerdo cu Stichting Algemeen Pensioenfonds Aruba (APFA) pa incorpora trahadonan di Gobierno cu contracto laboral (arbeidscontractanten) den e areglo di pensioen NPRfit. E acuerdo ta representa un paso importante pa brinda e grupo di trahadonan aki oportunidad pa acumula pensioen y construi mas siguridad financiero pa nan futuro y esun di nan famianan.

E ceremonia a wordo habri pa Minister Geoffrey Wever, cu a dirigi un palabra na esnan presente. Durante e encuentro, e representantenan di Gobierno y APFA a destaca e importancia di e acuerdo, cu ta resultado di un proceso di preparacion, dialogo y colaboracion entre diferente departamento y instancia envolvi.

Prome Minister Mike Eman a destaca cu e acuerdo ta resultado di un trayectoria largo, durante cual Gobierno, APFA y diferente organisacion a traha hunto pa logra un solucion. El a reconoce specialmente e e sindicatonan durante e reformanan di pensioen den pasado, cu a rekeri decisionnan dificil, dialogo y compromiso di tur parti involvi.

Eman a enfatisa cu pa logra un acuerdo di e naturalesa aki, Gobierno mester tambe crea e espacio financiero necesario pa por cumpli cu su responsabilidadnan. Segun Prome Minister, e importancia di e acuerdo ta den e oportunidad cu e ta brinda na e trahadonan cu te awor no tabatin e mes acceso na un areglo di pensioen, pa asina fortalece nan siguridad financiero pa futuro.

Minister di Husticia, Integracion y Transporte Publico, Arthur Dowers, a destaca e importancia di dialogo y colaboracion pa logra solucion cu ta beneficia tanto e trahadonan como e comunidad. El a enfatisa cu participacion den un fondo di pensioen no solamente ta contribui na siguridad financiero di un persona y su famia, sino cu un sistema di pensioen solido tambe por contribui na e desarroyo economico y social di nos pais.

Durante su discurso, Sheila van Veen, directora di APFA, a destaca cu e firma di e acuerdo ta mas cu solamente un acto formal. El a enfatisa cu pensioen no ta trata solamente di cifra y resultado financiero, sino principalmente di hende, di siguridad financiero despues di un bida laboral. Tambe el a señala cu ta importante pa e generacionnan mas hoben cuminsa pensa riba nan futuro financiero y e importancia di acumula pensioen ora nan ta mas hoben.

Sherwin Vingal, Director di Finansa y Pensioen di APFA, a brinda mas splicacion tocante e areglodi pensioen NPRfit, cu ta un version mas flexibel di un areglo di pensioen existente. Vingal a destaca cu e acuerdo ta resultado di hopi trabou, coordinacion y colaboracion entre APFA, Departamento di Recurso Humano (DRH), Directie Financien y e ministerionan envolvi.

E acuerdo ta marca un paso concreto den e colaboracion entre Gobierno di Aruba y APFA, cu e meta comparti di construi un futuro cu mas bienestar pa nos tur.