Ronella Croes, CEO di ATA:
ORANJESTAD (AAN) – Directora di Oficina di Turismo (ATA), Ronella Croes, a splica den conferencia di prensa den e contexto di firmamento di e acuerdo cu Aruba Hospitality & Security Foundation, cu ATA y AH&SF ta reuni na varios momento cu e miembronan di e Hunta, pero tambe nan ta revisa varios plan y accionnan.
Esnan cu ta forma parti di AH&SF ta AHATA, ATSA, ATIA, KPA, y ATA. Esaki ta asegura cu diferente punto di bista ta bin dilanti tambe.
“Desde 2011, cu nos tin e experiencia mas di cerca cu e Fundacion aki, por bisa cu a enfoca riba diferente proyecto y actividadnan. Por menciona, por ehemplo, entrenamento pa esnan cu ta traha den e aspecto di seguridad den zona turistico y tambe entrenamento brinda na esnan cu ta traha na KPA, pero a yuda KPA, principalmente, na diferente manera, entre otro cu compra di ekipo, incluyendo pa Strand Politie. Tambe cu establecimento di oficina y diferente facilidad den e area di Oranjestad, unda ta brinda tambe e servicio necesario na turistanan cu ta bin cu barco, primordialmente”, CEO di ATA a menciona.
Croes a agrega cu un di e accionnan cu a tuma lugar ta e compra di camaranan cu a wordo coloca den e zona di Palm Beach. Esaki ta algun ehemplo di proyectonan cu a wordo ehecuta e ultimo añanan, Ronella Croes a menciona.
“Conhuntamente cu e Hunta di Directiva, den dialogo tambe, a bin ta prepara pa otro area cu nos ta haya hopi importante, y esaki ta e visibilidad. Nos tur ta corda e Visibility Team, cu mi ta kere a existi añanan pasa y cu a brinda sigur su fruto pa nos Industria turistico. Pues un di e metanan ta pa reintroduci un tipo di visibility team. Y esey, ta bin ta traha riba dje y como tal, e acuerdo cu nos a firma pa un duracion di tres aña ta enfoca riba reintroduccion di un plataforma asina aki, y e lo carga e nomber di ‘Tourism & Security Patrol’ (TSP)”, CEO di ATA a indica.
Esaki tin e intencion pa brinda asistencia na KPA, seguridad y vigilancia den diferente zona turistico. “Aki lo enfoca primordialmente riba nos playanan, lo cuminza pa acapara e zona for di Divi pa Tamarijn, te cu Ritz Carlton, y lo amplia esaki pa asina na dado momento cubri e area for di Bushiri te cu Arashi”, director di ATA a señala.
“E acuerdo aki tin un duracion di tres aña y lo sigura tur espacio pa e fundacion por traha y logra e metanan tambe, y e implementacion debi di e TSP”, Croes a agrega.
Banda di TOP (Tourism Oriented Polis) cu ta esun encarga cu turismo crusero, e Fundacion ta brinda mas seguridad y colaboracion cu esnan cu tin mester di esaki, pensando aki riba e turistanan y riba KPA tambe, cu por dirigi su mes no solamente riba e zona aki, pero kizas na otro partinan turistico cu tambe mester di atencion necesario.
