Acuerdo entre A.T.A. y CEDE Aruba pa mehora calidad di bida na Aruba

Compromiso pa dos aña di mei miyon florin

ORANJESTAD (AAN): Siguiendo e strategianan stipula di Aruba Tourism Authority (ATA) su strategia MACS (Multi Annual Corporativo) 2025-2035, tanto A.T.A. y CEDE Aruba ta comparti un interes comun den nan metanan y direccionnan como organisacion.

             Pa A.T.A., considerando e sentimento local y e bienestar di nos comunidad, un alineacion strategico cu CEDE Aruba ta beneficioso.

            “Pa nos ta importante pa por crea e balansa entre desaroyo economico, impacto di turismo y bienestar general di nos ciudadanonan. Pa comunidad por brinda un bon servicio na nos bishitantenan, nan mester ta feliz. Y pa yega na e nivel ey, mester por conta cu trankilidad social, mental y ambiental. Y na A.T.A. nos ta sigui duna di nos parti pa alcansa e nivel ey, sperando cu asina nos ta inspira mas entidad y negoshinan den comunidad pa haci mescos”, asina Ronella Croes, CEO na Aruba Tourism Authority a duna di conoce.

            A.T.A. a acerca CEDE Aruba y e ekipo di profesionalnan den A.T.A. a studia e diferente proyectonan y a concorda pa brinda sosten financiero di mey miyon florin, parti durante dos aña di tempo, pa realisa un lista di evento y programanan valioso. Ta trata aki di “Aruba Volunteers Platform”, un programa pa promove mas boluntarionan local como turista pa yuda organisacionnan den comunidad. Cu esaki kier logra pa mehora e responsabilidad social coorporativo y envolvimento activo di comunidad door di negoshinan local y internacional. Cu esaki ta facilita tambe “voluntourism” brindando e bishitante mas oportunidad pa duna bek. Banda di esaki e acuerdo ta inclui re-introduccion di e programa “Happy to Give Back” cu ta duna e bishitante e oportunidad di haci donacion cu ta bai bek pa nos comunidad. Tur esaki lo duna realse na campaña internacional lansa pa A.T.A. “When you love Aruba, it loves you back”.

            A aloca fondo pa e programa “Youth Afterschool Activities” pa por organisa un minimo di 10 programa di enrikecimento y liderazgo (tayer y actividadnan, 14 sesion pa grupo) pa 200 hoben local, den colaboracion cu partnernan y boluntarionan internacional. E programa lo preveni negligencia hubenil, stimula desaroyo personal y habilidad di liderazgo.

            A.T.A. ta contento tambe di a aproba sosten financiero pa e “Neighborhood Activities and Festivals”. Lo organisa 4 festival/evento basa den bario cu organisacionnan di comunidad, manera mercadonan di arte local, festivalnan di cuminda, ferianan intercultural. Esaki ta provee ​​e comunidad cu oportunidadnan pa intercambia. Kier logra un aumento di compromiso di comunidad, expresion cultural y oportunidadnan recreativo pa local y bishitante.

            E Plan Corporativo di A.T.A. y tambe e Strategia Corporativo Multi Anual, tur ta contene esfuersonan pa por logra e balansa corecto pa loke ta trata atencion pa calidad di bida di nos habitantenan, cual ta acapara tambe e sentimento di e comunidad den cual mester tin mas enfoke riba e aspectonan social. 

            Un ciudadano cu un bon calidad di bida, ta un ciudadano feliz. Y ta e empleado ey lo bay e extra-mile pa brinda un servicio superior na su clientenan. A.T.A. ta consciente cu mester haci mas pa garantisa un miho balansa den crecemento di turismo banda di balornan social, cultural y esfuerzonan pa protehe nos naturalesa. “Cu e acuerdo aki, mi ta convenci cu nos ta dal un paso, cu un bon partner strategico, pa logra cosnan grandi pa nos pais”, di acuerdo cu e CEO di Aruba Tourism Authority.