Acuerdo di exclusividad cu Quanten Consortium Aruba a termina

||| Divulga pa Minister Glenbert Croes 

• Gobierno y RdA ta bay reuni cu otronan interesa
• Meta ta pa usa tereno di refineria pa ‘energia’ 

ORANJESTAD (AAN): Durante un conferencia di prensa Minister di Labor y Energia Glenbert Croes a duna un update riba e situacion di e refineria na San Nicolas.

   “Pa loke trata e refineria y henter e tema di energia, boso por a weita cu na otro paisnan, principalmente Corsow, nan ta dunando basta updates riba e desaroyonan eynan”.

   Pa recapitula, na 2019 y 2020 e request for expresion of interes 1 y 2 a tuma lugar.

E prome tabata pa haya un compania cu ta capable pa reactiva e refineria of pa bin cu un industria complementario na e refineria.

   E di dos tabata pa bin cu un industria nobo, cu lo reemplaza e refineria, segun Croes.

El a sigui bisa cu di e proceso ey ta Quanten Consortium Aruba, LLC, a wordo escogi y Eagle LNG.

“Pa loke ta Eagle LNG e ta den pleno ehecucion pa loke ta permisologia, engineering y e diferente contratonan cu ta den proceso di finalizacion cu RdA”, segun e mandatario.

Pa loke ta Quanten Consortium Aruba, el a indica cu na 2021 e acuerdo di exclusividad cu nan tabata tin cu RdA a termina.

   “Despues cu e periodo di exclusividad entre RdA y Quanten Consortium a termina, RdA a cuminza acerca tur otro compania cu a participa na e proceso anterior, pero tambe a acerca otro companianan cu a expresa interes den e refineria”.

Awor RdA  ta pasando den e proceso di prescreening di e companianan aki y esaki ta inclui invita nan pa reunion, y pidi nan tur informacion (full disclosure) di entre otro kico ta an propuesta como proyecto.

Tambe ta pidi un background check di e gruponan interesa (KYC), como tambe un ‘full disclosure’ di nan forza financiero, pa wak nan capacidad pa por realiza e proyecto, segun e minister.

Croes a splica cu desde Diamars te cu fin di Juni Gobierno lo ricibi diferente bishita di gruponan interesa.

El a splica cu varios grupo ta bay bin Aruba, di cual uno a yega Diamars caba.

E gruponan lo sinti cu e minister di Energia, pero tambe cu e comite di negociacion di RdA, pa presenta nan plannan definitivo.

Varios aspecto di e gruponan lo wordo evalua, incluyendo credibilidad, vision di propuesta y business plan.