Acuerdo di cooperacion entre Corte Comun di Husticia y Corte di Husticia di Suriname

ORANJESTAD (AAN): Informe di Willemstad ta indica cu e siman aki na oficina di Consulado di Suriname

a firma un acuerdo di colaboracion entre Corte Comun di Husticia y Corte di Husticia di Suriname.

   E firmantenan di e acuerdo aki ta e presidentenan di e Cortenan, y a firma esaki den presencia di e Consul-General di Suriname, señora Zuiverloon, y señor Steg, accesor di maneho di Corte Comun di Husticia.

   Presidente di Corte di Suriname, mr. Rasoelbaks, tabata presente atravez di un coneccion di video digital.

   Cu e firmamento di e acuerdo aki a intensifica e cooperacion entre e dos Corte ainda mas, despues cu anteriormente, na October 2022, un delegacion di Corte Comun di Husticia a bishita Suriname.  Durante e bishita ey, a entabla un cooperacion renoba entre e Cortenan, y ademas a acorda cu Corte di Husticia di Suriname lo por haci uso di e sistema di registracion desaroya pa Corte Comun. E acuerdo firma riba 8 di Mei ta relaciona cu e intensificacion di e cooperacion riba entre otro e areanan di maneho di empresa, digitalizacion y capacitacion.