Actual Miss Youth Aruba 2024 ta un hoben cu lo kier bira Polis den futuro

ORANJESTAD (AAN): Esaki ta e dama hoben Jennely Winklaar, kende tin actualmente e titulo di Miss Youth Aruba 2024,

kende ta preparando pa bay representa Aruba na e certamen di Miss Teen Mundial na El Salvador.

   Jennely no ta djis siguiendo su soño di converti den un oficial di Polis na Aruba, sino tambe e ta triunfando como reina di beyeza!  Pues dos mundo, unda e ta un dama cu constant ta bay dilanti.  Su dedicacion tanto na su scol, como tambe su rol di representante di Aruba, ta bisa hopi di su fortaleza, disciplina, y amor pa su isla.

   E ta pasando den preparacion intenso, cu hopi dedicacion y sosteni pa un team uni increible su tras, den e buskeda di un soño.  For di pasarela te na sesion di pregunta y contesta, haciendo touch-up pa move riba stage, por bisa cu e ta cla pa conkista mundo.  E viahe aki ta mas cu un titulo, e ta encuanto pasion, perseverancia, y e poder di kere den tur hende.

   E certamen di Miss Teen Mundial na El Salvador ta wordo organiza pa e reconoci Francisco Cortez, kende tin mas di 35 aña di experiencia.  Miss Teen Mundial ta un di e number uno, caminda nan ta logra descubri historianan yen di pasion y dedicacion di candidatanan rond mundo.

   Un di e storianan ey ta di Jennely, kende cu su amor pa e mundo di beyesa y su compromiso firme pa su isla, ta traha incansabelmente pa haci’e briya.  Su meta ta claro: Haci lo mihor di su mes, no djis pa su soño, sino pa su comunidad.  E esfuerzo, pasion, y e trabao duro semper tin un proposito.