ORANJESTAD (AAN) – Den e conferencia di prensa yama pa Fundacion CCCA,
relaciona cu e siguiente Musical cu ta hiba e nomber di “Mi ta artista”, e actor hubenil Mateo Lopez, a hiba palabra.
“Mi ta un actor hoben cu ta cuminzando cu tur su actuacionnan awo y mi ta bezig ta tuma parti den e obra aki: “Mi ta un artista”, unda meneer Ferdinand a ofrece mi pa ta parti den dje. Te awo mi ta haya un experiencia hopi bunita, pasobra bo ta haya oportunidad di train, cu tur e compañeronan, cu tur hende cu tambe ta actuando, bailando, y tur cos di arte cu ta hopi bunita pa haci”, Mateo a expresa.
El a comenta cu e obra ta hopi original, y pa su persona mes el a trece un reto cu ta cantamento. E ta actua pero canta nunca el a pensa di haci, pero ta algo bunita pa e purba wak kico e por haci cu su voz y su curpa. Tocante su rol, ta trata di un mucha homber cu yama Gerard, cu ta un bailarin.
Su personahe ta estableci na Francia y esaki a trece cune cu e mester a adopta un acento frances, siña algun paso di ballet pa mucha homber, cu ta un tiki diferente na e mucha muher cu ta balia ballet. E ta haya interesante pa wak e diferente cambio entre muchanan muher y mucha homber. Actualmente nan ta bezig cu e training, Lopez a indica.
