Actividadnan di Scouting Aruba pa recauda fondo pa yuda hobennan bay Jamboree Mundial 2027

ORANJESTAD (AAN): Scouting Aruba a forma un contingente pa representa Aruba na Jamboree Mundial 2027 na Poland.

Como parti di preparacion pa e experiencia inolvidabel aki, participantenan ta organisa actividadnan pa recauda fondo pa cubri gastonan di nan participacion.

Den cuadro di celebracion di 50 aña di Santa Rosa y Dia di Alimentacion, Santa Rosa a organisa un dia di mercado y a ofrece Scouting Aruba e oportunidad pa encarga di e bar. E gesto aki a duna nos hobennan un oportunidad balioso pa traha hunto y recauda fondo pa yuda nan cu nan meta.

Pa Scouting, apoyo y sosten di comunidad ta esencial. Cada contribucion ta yuda habri porta pa hobennan biba experiencianan cu ta contribui na nan formacion. Ora comunidad, organisacionnan y empresanan ta uni man, nan ta inverti den desaroyo di hobennan cu ta siña tuma responsabilidad, colabora y sirbi nan comunidad.

E Jamboree Mundial ta reuni scoutnan di rond mundo pa comparti cultura, forma amistad y desaroya habilidadnan di liderazgo. Pa e contingente di Aruba, esaki ta un oportunidad pa amplia nan horizonte, crece como persona y representa nos isla den un ambiente di respet, paz y hermandad internacional.

Scouting Aruba ta expresa su sincero gratitud na Santa Rosa, Brouwerij Balashi y tur esnan cu, di un forma of otro, a contribui na e actividad. Boso sosten ta yuda transforma e esfuerso di nos hobennan den oportunidadnan pa nan futuro.

E proximo actividad pa recauda fondo lo ta un Car Wash, diasabra 28 di november 2026, na Scol Preparatorio Cacique Atarima. Ticketnan ta obtenibel cerca participantenan pa solamente Afl. 10,-

Scouting Aruba ta invita comunidad pa sigui sostene nos hobennan. Cada ticket cumpra ta un paso mas cerca di Jamboree Mundial 2027.