ACF inspirando futuro lidernan di conservacion na AFY su 'Career Fair'

ORANJESTAD (AAN):  Recientemente, e team di Aruba Conservation Foundation (ACF) a participa na un 'career fair' organisa pa e programa yama Academic Foundation Year (AFY) di Universidad di Aruba.

            Durante e mainta aki, nan team a duna un bista amplio di e trabou central na ACF, incluyendo nan transicion di un organisacion di maneho di parke pa un di maneho di conservacion y un actualisacion riba nan proyectonan di conservacion andando.

            Tabatin e oportunidad tambe pa mustra e oportunidadnan di carera y tambe di boluntario den nan organisacion, invitando e siguiente generacion pa join nan den nan proposito.

            Conservacion di naturalesa ta rekeri planificacion a largo plaso como accion inmediatamente, pues ta importante pa nos construi un futuro di forsa laboral cu ta dedica na conserva Aruba su ecosistemanan natural rico y diverso. ACFta spera sinceramente cu e studiantenan a sinti nan mes inspira.