Tripulante herida den area di Barcadera
ORANJESTAD (AAN): Diahuebs anochi un accidente a tuma luga riba lama caminda un boto a dal pega riba rif na momento cu e tabata nabega yega Aruba.
Centro MOC, cu ta e Centro Maritimo di Operacion di Wardacosta den oranan di anochi a ricibi un yamada cu tin un accidente cu a tuma luga den area di Barcadera caminda un boto lo a pega riba rif.
Mesora Wardacosta a dirigi un Metal Shark pa bay na e area. Na yegada na Barcadera, e agentenan di Wardacosta a mira e boto y dos persona riba tera. E personanan a declara cu durante e biahe, e embarcacion a bay pega riba un rif y cu un di e hombernan a haya herida na su curpa.
Un barco local tambe a yuda duna asistencia y e agentenan di Wardacosta a yuda e dos hombernan abordo di e Metal Shark.
Despues nan a wordo transporta pa e pier di Daltra banda di Barcadera, unda un Ambulance tabata warda nan.
